Polis lo listra preventivamente riba arma durante Carnaval 2016

Posted on 12/30/2015, 1:17 PM AST | Updated on 12/30/2015, 5:46 PM AST

ORANJESTAD - Ministerio Publico y Cuerpo Policial di Aruba ta informa, cu polis lo listra preventivamente (preventief fouilleren) riba posesion di arma y droga durante tur actividad grandi di Carnaval na Oranjestad y den Zone II banda di e hotelnan high rise. E area aki ta core di Ritz Carlton te House of Cheng, bao di cual ta cay De Olde Molen. E ordo a wordo duna pa Ministerio Publico, despues cu Minister di Husticia, Alto Comisario di Polis y Fiscal Mayor a dicidi, pa listra preventivamente riba posesion di arma y Huez Comisario a dicidi pa duna autorizacion, pa listra preventivamente riba posesion di arma.

E accion di listra preventivamente ta cubri e siguiente actividadnan:

Fakkel.Riba diasabra 2 di januari 2016 di 6’or di anochi te diadomingo 2 di januari 2015 pa 6’or di mainta na Oranjestad y den Hotelzone II. Lighting Parade. Riba diasabra 30 januari 2016 di 6’or di anochi te diadomingo 31 di januari 2015 pa 6’or di mainta na Oranjestad y den Hotelzone II.. Carnaval di Mucha Oranjestad.Riba diadomingo 31 di januari 2016 di 2’or di atardi te dialuna prome di februari pa 2’or di madruga na Oranjestad y den Hotelzone II.. Parada Grandi.Riba diadomingo 7 di februari 2016 di 12’or di merdia te mey di anochi na Oranjestad. Riba diadomingo KPA lo ademas aplica preventief fouilleren desde 6’or di anochi den Hotelzone II.

Den cuadro di e accion di listramento preventivo riba posesion di arma, KPA ta autorisa pa para personanan na manera arbitrario y listra nan pa arma na nan paña. KPA ta tambe autorisa pa listra autonan y otro vehiculonan pa arma. Ademas KPA ta autorisa pa pidi pa habri cahanan, tasnan y otro pakinan pa listra pa arma. Ministerio Publico a autorisa KPA pa por haci esaki y na su turno, Ministerio Publico a pidi e autorisacion aki na Huez Comisario.