Huez ta scucha testigo pa caso Rincón dia 1 di februari 2016

HOUSTON/ORANJESTAD – E caso di e comerciante Venezolano deteni na Merca, esta Roberto Rincón, ta poni pa cuminsa 1 di februari 2016. Documentonan di corte, cu NoticiaCla.com a pone man ariba, ta mustra cu riba e fecha ey, ta cuminsa cu e seleccion di hurado, pa despues e caso inicia. Anto aki tambe tin un rapidez enorme, mirando cu corte di Houston, Texas, a pone 10 dia total pa trata e caso criminal aki. (Lesa e documento aki)

CASONAN TA TARDA NORMAL

Manera ta conoci, casonan criminal na Merca ta dura basta, prome cu nan bin dilanti un huez. Esaki por varia di 7 luna pa 3 aña. Den e caso aki sinembargo, apenas a detene Rincón dia 16 di december 2015, y apenas 7 siman despues tin un fecha caba pa su caso bin dilanti. No ta conoci kico a motiva corte di Houston, pa ‘speed up’ e caso asina lihe te pa pone un fecha pa esaki caba.

EMBERGADURA PA ARUBA

NoticiaCla.com a bin ta sigui e caso aki di cerca, mirando e embergadura cu e por tin pa Aruba. Manera cu e portal aki a raporta caba tambe, e hecho cu Rincón tin propiedad aki na Aruba tabata importante pa huez Mericano, Nancy Johnson, pone como un motibo pa detencion di Rincón. Sinembargo, e oficina di huez no kier a duna motivacion na e portal aki, pakico a dicidi di pone esey como un di e 5 puntonan pakico mester a detene Rincón recientemente na Merca. Loke tambe ta conoci, ta cu parti di e investigacion pa cu e caso, a tuma lugar na Aruba, esta pa mira cu ki placa Rincón a cumpra e propiedadnan na Aruba y con mas e envolvimento di e comerciante Venezolano aki ta cu nos isla y su transaccionnan.