Docternan no-BIG registra por traha na Aruba

ORANJESTAD – Docternan Rubiano cu a studia den paisnan cu no ta BIG registra (lesa aki kico BIG registratie ta ensera) , por traha na Aruba awor. Esaki a keda confirma pa director di Medwork Caribbean NV, Ru Croes na NoticiaCla den forma di primicia. Segun Croes, awor cu docternan di cas na Aruba cu ta miembro di HAVA (Huis Arts Vereniging Aruba) no ta traha carta di AO, otro docternan si por hacie. “Bo no mester ta BIG registra pa por haci esaki” Croes a sigura NoticiaCla. Masha anja tin problema cu e asunto aki unda cu studiantenan di Aruba ta haya nan mes pega, ora cu nan caba studia pa docter den paisnan latino cu no ta registra pa BIG.

For di momento cu e informacion a sali na mei ultimo, e compania Medwork a cuminsa duna empleo na docternan cu a studia na e.o. Costa Rica y region. Nan ta haya un training pa por atende cu e clientenan aki. “Nan no ta docternan curativo, pero nan por haci e trabou di control di absentismo”. Pues e ta crea un trabou pa e grupo aki, cu te awor no por wordo contrata pa traha. “Cu cooperacion di gobierno, nos si por duna e docternan Rubiano cu a studia na p.e .Colombia, Costa Rica y otro paisnan un chens pa traha na Aruba como docter” Croes ta sigui bisa. En principio no mester di e BIG registratie pasobra esaki ta si bo kier un contracto cu AZV, e ta un exigencia. Den e ramo di trabou na Medwork, bo mester ta un docter si, cu bo diploma. Nan lo traha bou di supervision di docternan cu si tin BIG registratie. Tanten cu e control aki ta bon regla y cu ta duna e docternan training interno, por desaroya un industria nobo pa Aruba.

NoticiaCla a raporta mas prome, cu docternan di cas, -miembro di Huis Artsen Vereninging Aruba (HAVA)-, entrante diabierna awor 1 di Augustus no ta firma carta di AO (Arbeids Ongeschikt) mas. (lesa e participacion di HAVA aki ) Entrante e fecha aki, trahadonan cu mester meld AO, tin cu acudi na un instancia priva cu ta prove e servicio aki. E practica di firma carta di AO ta wordo considera pa HAVA como un estorbo pa e docternan di cas y como tal a opta pa no haci esaki mas. Mes momento e cambio aki ta percura tambe pa un miho control enves di un ‘onderonsje’ entre e docter di cas y su pashent cu e conoce caba.