Polisnan atento a logra preveni tragedia riba lama

ORANJESTAD - No tabatin melding di un boto perdi, sinembargo polisnan durante di patruya rutinario, a mira un bela cu ta parce un "Hobie Cat" leu di tera y a dicidi di acerca e boto, pa check si tur cos ta na ordo. Yegando cerca, nan a constata cu enberdad tabatin un persona pidiendo yudansa. E incidente aki a tuma luga pa mas of menos cuarto pa un diamars merdia.

POLISNAN AL RESCATE

Miembronan di Cuerpo Policial consciente y atento a preveni un tragedia riba lama, ora cu nan a dicidi di acerca e boto, como cu e persona riba e boto no por a logra bolbe tera su so. El a splica polis, cu e ta un empleado di Aruba Watersports y mas tempran el a bay cu un otro colega den boto, pa yuda algun turista cu tabata riba e Hobie Cat. E mes a keda riba e Hobie Cat, mientras cu su colega a bay hiba e turistanan bek tera. Aparentemente, e colega a lubida riba dje y consecuentemente e Hobie Cat a drief bay basta leu cu ne.

PERSONA A BIRA MALO 

Polis a rescata e persona, na mas of menos tres miya pabou di Aruba. Mientras cu nan tabata transporta e persona riba boto di polis pa tera, e persona a cuminsa bira malo y a perde conocemento. Cuerpo Policial a avisa ambulans, cual a bin topa cu nan na e pier di Hyatt Regency, unda cu personal di ambulans a duna e persona tratamento y a dicidi di hib'e hospital pa observacion.