E prome mucha cu a haya implante cochlear a bishita Prome Minister

ORANJESTAD- E hobencita Mady-Ann Dirksz, hunto cu su mama y welonan, a bishita Prome Minister Eman, pa gradici’e pa su ayudo y intervencion na momento cu e ayudo aki tabata hopi necesario. Mady-Ann a nace, mescos cu algun otro mucha, cu problema serio di oido. Esaki a keda constata door di Wit-Gele Kruis. Mady-Ann ta e prome mucha, cu a wordo opera pa haya un ‘cochlear implant’ pa e por a tende.

E OPERACION

E operacion a tuma lugar door di intervencion di Prome Minister Mike Eman, kende a wordo aserca door di dr. Cabenda. Club di Servicio Quota Club y FEPO tambe tabata envolvi den busca un solucion, pa e grupo di mucha cu problema di oido. Dr. Cabenda e tempo ey, a aserca Prome Minister Eman, pa pidi su intermediacion. Eman a haci tur esfuerso, pa por a logra haya financiamento pa e operacionnan aki. Hunto cu Profesor Stokroos, dr. Cabenda a haci e operacionnan cu a resulta exitoso. Awe, Mady-Ann ta un mucha alegre, yen di bida, tin bon oido y tin un bida mescos cu tur otro mucha di su edad.

CAMINDA LARGO

Mama di e Mady-Ann, sra. Mandy Dirksz, a bisa di ta masha agradecido na Prome Minister Eman, pa a haci tur lo posibel pa yuda su yiu. “Nos caminda tabata largo. Nos a acerca e gobierno di e tempo ey y nan no a yuda nos cu nada. No pa Mady-Ann so, pero pa e otro muchanan, cu tambe mester a wordo opera pa e problema di oido cu nan tabatin. Mi tata tabata na punto di bende su cas, pa yuda nos bay Hulanda, pa haya eynan e ayudo cu nos tabata busca.” Dr. Cabenda a bisa e mayornan, cu e ta bezig pa haya un solucion y pa tin un poco pasenshi. Cabenda a acerca Eman y hunto nan a logra. “Riba un dia nos a haya e bunita noticia, cu na Aruba mes e muchanan ta bay wordo opera. Esey tabata un alivio grandi.” Mama di Mady-Ann a conta, cu for di su nacemento te cu su tres aña ora el a wordo opera, Mady-Ann no tabata papia ni un palabra. Despues di su implante, el a haya ayudo di FEPO y scol pa siña papia y awe e ta tende y papia. “Esaki a cambia e futuro di Mady-Ann completo.” Mandy Dirksz a bira un poco emocional, ora el a bisa di no tin palabra na mundo pa e por expresa su gratitud na Prome Minister Eman, kende a ‘walk the extra mile’ pa nan y pa e otro muchanan. “Nos bida awe y di Mady-Ann ta miho danki na su ayudo.”

REGALO PA PROME MINISTER

Mady-Ann, 7 aña, a regala Prome Minister Eman un potret den su leishi, unda e prome mandatario ta braz’e despues di su operacion, cu a cambia su bida y esun di su famia. Prome Minister Mike Eman tabata contento di tende con Mady-Ann ta papia sin problema.