AZV: Paga extra pa haya remedi di marca posibel na 2016

ORANJESTAD - For di dia 1 di januari 2016, ta bay ta posibel pa paga e diferencia di prijs, entre un remedi di marca y e remedi generico, pa por ricibi e remedi di marca na bo botica. Remedi generico, ta remedi cu ta wordo cubri door di AZV. Antes tawata asina, cu si un persona kier haya e remedi di marca, e mester a paga 100% di e prijs, pero esaki ta cambia den 2016. Prome cu ta dicidi di haci uzo di e posibilidad, nos ta conseha tur hende pa informa bo mes bon tocante remedi generico.

REMEDI GENERICO

Kiko ta un remedi generico?

Un remedi generico, ta e ekivalente terapeutico di un producto farmaceutico original, di cual su patente a caduca. E ta contene mesun ingrediente activo, cu e original y p’esey e ta ekivalente y intercambiabel cu e remedi di marca. Un remedi generico ta wordo poni riba mercado, teniendo cuenta cu e leynan internacional di patente. Na Europa cada bes mas, e docternan ta prescribi remedi generico, como alternativa eficaz di remedinan di marca mas caro.

DIFERENCIA REMEDI GENERICO Y DI MARCA

Kico ta e diferencia entre un remedi generico y un di marca?

No tin ningun diferencia terapeutico entre un remedi generico y un remedi di marca. Tin un diferencia den prijs, si. Un remedi generico ta 20 te 80% mas barata, cu e producto original. Remedi generico por contene otro ingrediente inactivo (por ehempel, colorante, zetmeel, sacharose etc.) cu no tin efecto terapeutico.

KEN TA CONTROLA

Ken ta controla e calidad, seguridad y eficiencia di un remedi generico?

Igual cu cerca otro remedi, e calidad, seguridad y efectividad di un remedi generico ta garantiza. Na Aruba nos ta wak kico e autoridad competente na Union Europeo of na Merca (Food and Drug Administration) ta dicidi. Pa haya autorizacion pa subi mercado, e producto mester ta bio-ekivalente na e producto di marca. Pa remedi generico ta conta e mesun procedura cu pa esun di marca. E proceso ta tuma 1 pa 3 aña prome cu un producto por wordo bendi.

TARIFA DI REMEDI GENERICO

Remedi generico ta mas barata di berdad?

Si, tin un diferencia di prijs significante. Remedi generico ta promedio 20 te 80% mas barata cu remedi di marca.

BENEFICIOS

Con e pashent y salubridad en general ta beneficia di remedi generico?

E uzo di remedi generico ta inmediatamente visibel den e costonan den comparacion cu e remedinan di marca. Asina por spaar placa den salubridad y uz'e pa otro tipo di tratamento nobo y caro, pa cual no tin un alternativa mas economico ainda.

INFORMACION

Unda mi por haya mas informacion tocante remedi generico?

Pa haya mas informacion specifico of otro pregunta tocante bo salud, nos ta conseha pa consulta bo dokter di cas of e specialista cu ta trata bo of pa bay bo botica pa puntra e farmaceutico. Tambe tin informacion riba e website azv.aw.

PAGA DIFERENCIA

Si mi kier toch un remedi di marca, mi por paga e diferencia?

Si, for di dia 1 di januari 2016, e ta posibel pa paga e diferencia den prijs, entre un producto generico y un producto di marca na bo botica y asina haya esun di marca. Prome tawata asina, cu ora un persona kier e remedi di marca, e mester a paga e producto 100%. Awor, ta djis e diferencia den prijs cu e producto generico.