Termino entrega declaracion winstbelasting 2014 prolonga cu un luna

ORANJESTAD – Departamento di Impuesto ta informa su clientenan, cu tin e obligacion di haci declaracion di winstbelasting 2014, cu dia 1 di februari 2016, ta bira e ultimo dia cu por entrega e declaracion di winstbelasting y haci e pago corespondiente. Departamento di Impuesto ta prolonga e termino di 30 di december 2015, cu 1 luna en conexion cu transicion (“overgangsrecht”) pa motibo di e cambio di ley di winstbelasting; winstbelasting no ta un ‘aanslagbelasting’ mas sino un ‘aangiftebelasting’.

DECLARACION PROVISIONAL

Si acaso, e cliente no ta alcansa pa entrega su declaracion definitivo pa dia 1 di februari 2016, e cliente lo mester entrega un declaracion provisional (“voorlopige aangifte”) y haci e pago corespondiente, cu ta fungi automaticamente como un peticion pa prolongacion di termino. E cliente lo ricibi un carta, den cual ta confirma cu a prolonga e termino pa entrega e declaracion definitivo. Den e caso ey, e cliente lo mester entrega e declaracion definitivo di winstbelasting 2014, no mas laat cu dia 31 di maart 2016.

AÑA ECONOMICO NO CORESPONDIENTE

Pa e clientenan, cu ta mantene e aña economico no igual cu e aña calendario, mester consulta e nota informativo of e website di Departamento di Impuesto, pa mira e ahuste di e fechanan final pa entrega e declaracion y haci pago.

APELACION

Departamento di Impuesto ta haci un apelacion na su clientenan, pa no warda te na ultimo cu e entregamento di declaracion y pago corespondiente. Clientenan cu a finalisa nan cuenta anual di 2014, por pasa entrega nan formulario di winstbelasting 2014 y haci e pago corespondiente, promer cu e termino vence.

COBRANSA ADICIONAL

Si no cumpli cu entregamento di e declaracion provisional y/of e declaracion definitivo, e cliente lo haya un cobransa adicional, esta un ‘naheffingsaanslag’ y un boet. Esaki tambe ta e caso, si acaso e cliente a paga un suma menos cu locual el a declara na winstbelasting. E boet pa no cumpli cu entregamento di e declaracion ta maximo Afl. 2.500,-. Si no haci e pago di winstbelasting of no haci e pago corectamente, e boet ta maximo Afl. 10.000,-.