DESPA: Consecuencia di klapchi ta pa bida largo!

Posted on 12/29/2015, 10:23 AM AST | Updated on 12/29/2015, 12:06 PM AST

ORANJESTAD -  Poco dia mas falta pa nos bisa aña 2015 ayo y yama 2016 un bon bin. Na Aruba ta nos custumber di haci esaki cu hopi tiramento di klapchi, pa core cu e fucu bieu. Grandi y chikito ta disfruta tirando klapchi di diferente tamaño y di tur color. Klapchi sigur ta trece hopi alegria, pero tambe por trece hopi tristesa y dolor si no tir’e cu cautela y segun su indicacion. Un accidente por pasa den un fraccion di seconde. Pa e motibo aki a scoge e aña aki pa e lema: Consecuencia di klapchi ta pa bida largo! A pone atencion riba 3 persona na Aruba, cu ta victima y ta biba te dia di awe cu e consecuencianan di klapchi, cu a rementa riba nan. Nan nunca por a pensa cu nan bida lo a cambia pa semper.

TIPS

Departamento di Salud Publico conhuntamente cu Comision Vuurwerk, ta sigui conscientisa comunidad riba e uzo corecto di klapchi y kico comunidad mester tene cuenta cu ne, ora di bay cumpra klapchi:

Muchanan bou di 12 aña di edad no por cumpra klapchi. Cumpra klapchi cu no ta mas bieu cu 2 aña bieu (di aña 2013 ya caba ta prohibi pa bende). Cumpra klapchi adecuado pa edad di cada mucha. Semper cende klapchi cu mecha di cende. No cumpra ni cende klapchi cu bo no sa kico e ta bay haci. Supervisa muchanan chikito na tur momento. No laga klapchi na alcance di mucha. No tira klapchi si bo ta bou influencia di alcohol of droga. No tira klapchi den direccion di otro persona, animal of den vecindario directo di  hospital, IMSAN of cas di hende grandi. Uza earplugs si e zonido ta mucho duro. Tene cuenta cu e concentracion di huma di klapchi, por afecta salud di personanan delicado di salud.

Teniendo na cuenta cu klapchi por ta peligroso y tirando esaki conscientemente, nos lo habri un aña nobo feliz sin ningun incidente. Corda semper cu fin di aña ta pa celebra, no pa lamenta. Feliz aña nobo comunidad henter, ta deseo di Departamento di Salud Publico.