Croes: Con internet a cambia e manera cu nos ta biba awe

ORANJESTAD - Awendia na momento cu bo sinta traha un mensahe, pa manda via Facebook of Twitter, bo ta usando e conexion di Internet pa post, pero tambe pa 'stream' musica, check Facebook update, paga cuentanan online, of warda pa un yamada di video. Den cualkier oficina por nota cu nos ta rondona, cu tur locual nos mester pa por funciona a base diario, y esaki ta danki na Internet.

Nos por celebra e 20 aniversario di Internet na Aruba, ya cu internet a logra masha hopi mes den e añanan cu a pasa. Segun algun datonan social economico, ta calcula cu 2.4 biyon hende ta bai online tur dia. Tin mas o menos 600 miyon websitenan online; y ta manda 500 miyon 'tweets' tur dia. E Internet a transforma e manera cu hende ta biba completamente, pues kico tur e hendenan aki ta haci tur dia? Interconectando. E Internet ta permiti nos “papia cu otro” sin tin mester di pone un telefon na bo orea. Ta parce cu nos telefonnan ta simplemente pa nos text, whatsapp of tweet esnan cu nos kier comunica cu ne. Amigo y conocinan di pasado ta re-conectando, famianan ta comunicando mas cu otro, amigonan no tin mester di keda sin wak otro hopi y conexionan di trabou por florece y crece. Mas y mas ta kies pa shop online awendia. Bo por lesa e comentarionan di e productonan, e rating y localisa e mihor prijs y paga bo cuenta sin tin mester di haci mucho esfuerzo. Ademas di keda al dia kico, tur celebridad y amigonan ta haci, ta uza 'Streaming', haci 'online banking', hunga weganan 'live' di video y mucho mas. Casi nos no por imagina nos bida sin internet. Tur sector na Aruba ta haci uso di Internet. Nos periodistanan, nos scolnan, nos departamento di salud, nos sector di turismo, nos airport, nos comercio, nos tiendanan, nos economía en general. Internet a bira un herment indispensable. SETAR a anticipa 20 aña pasa un tecnologia nobo, cu awe a crece y ta creciendo tur dia, cual a bira un aspecto importante pa nos comunidad pa progreso.

Recientemente, Roland Croes, director di SETAR (e pionero di Internet na Aruba) a bisa cu un di e retonan di mas grandi cu SETAR ta enfrentando, ta pa despues cu a trece internet te cu 100 Mbps na cada cas na Aruba, ta pa percura pa den e cas e sistemanan di Wi-Fi y red den e cas logra e speednan halto tambe. E red di cable submarino, red di cable local y red interno den cas of negoshi combina cu e “devicenan” manera laptop, PC, Smartphone, tur ta forma loke ta yama e “ecosystem” di Internet.

SETAR ta observa, cu 20 aña pasa nan a introduci Aruba na internet y awendia e ta un di e tecnologianan cu mas a revoluciona e manera di traha y biba den nos era moderno.