Doñonan di Antraco frustra cu situacion di ladronicia na Aruba

ORANJESTAD - "E cosnan aki no por keda asina". Na palabra propietario di Antraco Holding, Robert Croes, despues cu riba prome dia di Pasco, ladronnan a drenta su lugar cu auto, kibra e entrada y horta e safe. Croes obviamente ta frustra di loke ta pasando particularmente cu su negoshi. Segun Croes, den e ultimo 5 añanan, Antraco tin mas cu 3 caso pendiente cu polis.

CASONAN PENDIENTE

Uno di nan ta hopi grandi unda un suma hopi halto di placa a wordo horta, y te cu awe no ta tende nada di dia “uno” di polis. “ E persona envolvi, cu ta duidelijk sospechoso, a bai fo’i Aruba te cu e ta bek,” Croes a bisa. “ Anto e manager no ta traha na Antraco mas y ta traha bon bon awo na un otro compania.”

ULTIMO CASO DI LADRONICIA

Den e caso aki, dia di Pasco di diabierna, Samsom Bookstore a bolbe bira victima di ladronicia. "Ta claro via video, cu e ladronicia a wordo ehecuta den tempo record y e ladronnan a sali cu e kluis. Dus polis ta pensa, cu tin informacion crucial di paden den Samsom Bookstore, cu a sali pafo,” Croes a sigui bisa. “E ladronnan a wordo captura riba video. Nan tabatin mascara bisti, pero segun Croes por reconoce diferente aspectonan di nan."

ALGO COMUN NA ARUBA

Segun Croes, tur esaki no ta raro den e 'business community' di Aruba, ya cu ta tur siman tin algo similar ta pasa. Gerencia di Antraco ta spera, cu tin un investigacion completo, ya cu ta trata di algo basta serio y cu ta afecta e tienda y su trahadornan y tambe algun ex-empleado.

SAMSON BOOKSTORE CLA PA BUSINESS

Si ta asina, cu e operacion di e tienda Samsom Bookstore casi no a wordo afecta y cu ayudo di CAT N.V., a logra pa e tienda habri dialuna caba manera custumber. “ Hopi hende den comercio, ta traha duro y horas largo, pa por bai dilanti den un economia dificil, durante e epoca di pas aki y ta jammer e ora ey, cu tur nan esfuersonan ta bai perdi dor di actonan asina.”