Caso di homber cu a fayece dilanti IMSAN ta wordo investiga

SAN NICOLAS — Departamento di Salud ta investigando e caso di e homber di inicial A.P., cu a fayece riba prome dia di Pasco. Asina e vespertino Amigoe ta raporta den su edicion di dialuna. A.P, cu a wordo manda cas dos biaha pa e docter di sala na IMSAN, a fayece finalmente riba e parkinglot di e centro.

DIRECTOR IMSAN

Segun un comentario di e director di IMSAN, Joel Rajnherc na e vespertino, e ta considera e caso como uno ‘hopi tristo’. El a confirma cu ela raporta e incidente mesora cerca e Departamento di Inspeccion na Departamento di Salud, cu ta encarga cu e investigacion.

E SUCESO

Manera NoticiaCla.com a raporta caba dialuna mainta, e homber en cuestion a bira malo riba prome dia di Pasco, y a wordo hiba IMSAN pa su famianan. E docter di turno a mira e pashent, pero no a mira motibo pa intern'e e momento ey. Mas lat anochi, e mesun pashent a bolbe cu e mesun keho. Atrobe e docter di turno a mand'e cas. E famia no a tuma e situacion bon y a reacciona den un forma menasante. Mes momento polis a keda envolvi. E homber a wordo treci pafo den un rolstoel, unda cu ey pafo el a bira mas malo diripiente. A purba reanima e persona pero tabata laat. E investigacion tambe ta den man di recherche.

REACCION SPECIFICO

Segun e director di IMSAN, e no kier a reacciona specificamente riba contenido di e caso. “Loke si mi por bisa ta, cu mesora ora cu mi a wordo informa, mi a inicia un investigacion y a pidi tur documento relevante di e caso. Mi a papia tambe, cu e docter na warda y cu inspector Salazar di Departamento di Salud." Mientras cu no tin un inspeccion independiente di salud, tin un departamento asina cu ta funciona si pa 8 aña na Departamento di Salud. E director no a papia cu e famianan ainda.

FAMIA HOPI RABIA

Famianan di e defunto a reacciona hopi rabia e indigna riba e caso, unda cu e.o. e yiu muher a haci esaki riba e rednan social. Aki el a conta entre otro, con su tata a haya dos ataca di curason riba e dia, pero cu e Departamento di Prome Auxilio di IMSAN, no kier a yud'e.