Croes: Sueldo minimo ta subi dia 1 di februari 2016 cu 2.5%

ORANJESTAD – E fecha oficial pa aumento di sueldo minimo ta conoci. Minister di Labor Paul Croes, a informa den fin di siman, cu esaki lo ta dia 1 di februari proximo, y a confirma e porcentahe cu ta 2.5%. E anuncio mes a bin di parti di Prome Minister Mike Eman, recientemente durante tratamento di presupuesto supletorio. Na e ocasion ey, e mandatario a informa Parlamento mesora di esaki, y a confirma cu su introduccion lo tabata pa 2016. A kere cu esaki lo tabata bira un hecho, cu cambio di aña 2016. Pero awor ta conoci cu esaki lo ta 1 di februari 2016. Motibo ta, cu no a keda cla na tempo pa introduci esaki pa 1 di januari 2016, sino lo a haci'e.

HUSTIFICACION

E mandatario ta hustifica e decision di aumento, cu e hecho cu pa 3 aña, esaki no a aumenta. Tambe cu a consulta cu gremionan sindical. E mandatario ta sigura cu despues di a tende tanto e organo consultativo SER (cu a propone 1%) y gremio sindical (cu a propone 2.6%), a bisa cu a busca un posicion mei mei cu, segun minister, ta 2.5%. Sinembargo, calculacionnan ta bisa, cu un posicion mei mei, lo tabata 1.6% y no 2.5%. No ta conoci con a calcula e cifra di 2.5% siendo e posicion ‘mei mei’. Pa loke ta e declaracion di e mandatario, e la sigura cu e aumento lo ‘no crea un aumento den inflacion necesario den comercio.’