Con pa atende cu bo mascota ora di klapchi

ORANJESTAD - Cu benta di klapchi, ta bin un otro dolor di cabes pa doño di mascota, specialmente cacho. Cachonan nan orea ta desaroya miho cu e ser humano, cu ta pone cu nan por scucha cosnan miho cu e ser humano. Normalmente esey ta algo positivo, pero den e caso aki, e ta traha den nan contra. Y consecuentemente, e ta pone cu durante e periodo ‘cortico’ di awor te fin di aña, e cacho ta experencia su temporada di mas pio di aña. NoticiaCla.com ta publica algun tips di Aruba Dog Academy, cu por ta util, pa un persona cu tin cacho(nan), por sigura cu nan ta pasa e periodo aki mas trankil y miho posibel.

Entre e tipnan pa bo cacho durante temporada di klapchi

Percura pa a haci hopi ehercicio cu bo cacho(nan), sea e mesun dia of e dia anterior. Esaki por ta caminata largo y structura. Cu structura, nos kiermen, lidera e cana, pa asina e cacho tin cu ta enfoca mentalmente y fisicamente. Asina e ta cansa mas lihe y profundo y por ta mas relaha despues ora cu tin klapchi. Sigur riba e anochi di cambio di aña. Tene bo cacho(nan) den cura, y percura pa e cura ta suficiente na ordo y halto of di tal manera cu e cacho no por bula esaki, en caso e spanta di e klapchi. Un cacho den stress por bula muraya hopi halto. Si e muraya no ta hopi halto, murayanan cu tin staca di hero of halto cu ta stroba e cacho di tin un ‘houdvast’, e cacho no ta comfortabel pa bula e cura. Depende e situacion di e cas y grandura di bo cas, por pone e cacho paden, cu musica como distraccion y tambe e compania di hende. E cacho ta sinti su mes den compania y ta distrai den un forma placentero. Y cerca hende e ta mas trankil. Nunca tira klapchi den cercania di e cacho(nan). No forsa nan pa ta cerca tampoco. Nan ta keda traumatisa y no ta bin despues ora cu bo yama(nan). Klapchi NO ta nan miho amigo. Laga nan trankil y leu di klapchi. Si e cacho ta custumbra di ta den un kennel, lag'e eyden. Hopi cacho ta asocia kennel (crate) cu algo positivo y nan lugar di refugio. Si nan no ta custumbra, no bay pusha nan den e kennel. Nan lo bira mas agresivo y purba haci tur posibel pa sali afo. Nan te hasta por haci nan mes daño e ora. Percura pa bo cacho ta bon identifica. Sea un banchi cu su nomber y telefon di e doño. Of 'chip' bo cacho. E banchi por kibra y perde liher y e ora e identificacion tambe a bay perdi. Laga bo cacho den compania di su co'i hunganan faborito of treatnan, cu e ta gusta pasa tempo ariba. Actua NORMAL rond di bo cacho ora di klapchi. Nan ta sigui e patronchi di hendenan cu ta ‘trankil’ y normal. Si bo actua excita, nan tambe ta excita y no ta rasona ni controla mas. Ora cu un cacho ta spanta y ta core bin cerca bo, NO aai of caricia e cacho. E estado den cual e cacho ta (stressed, miedo) no ta e momento pa aai of caricia e cacho. Si bo aai e cacho e momento ey, bo ta dun'e e señal cu ta OK pa tin miedo. Haci normal. Actua normal, y e cacho lo compronde cu tur cos ta ok, incluyendo e zonido ‘duro’ di klapchi. Si MESTER, por uza pilder calmante. Veterinarionan ta bende esaki y ta bende a base di e PESO di bo cacho. SA e peso di bo cacho PROME bo bay veterinario. E veterinario lo sa e dosis di duna, a base di e peso. Normalmente e efecto ta drenta den e cacho, mei ora despues. No bay duna bo cacho DI MAS, pa NO overdose e cacho.

Aruba Animal Care Clinic tambe suministra mas informacion acerca, specificamente riba e parti medicinal.

Medicacion pa aña nobo:

Tin diferente tipo di medicacion disponibel. A base di literatura cientifico nos di Animal Care Clinic a scoge e aña aki pa Diazepam. Esaki ta tambe e medicamento mas receta na Hulanda. Diazepam (Valium) ta un substancia cu un funcion sedante y calmante di angustia. Bo mascota ta sinti soño di medicamento. Esaki ta normal. Diazepam tambe ta causa perdida di memoria: y e bon di esaki ta, cu e ta preveni cu bo cacho lo corda di e miedo pa klapchi. Diazepam ta traha lihe. Por cuminsa duna e medicamento e anochi di fin di aña. Duna e dosis corecto di Diazepam minimo un ora antes di e tiramento di klapchi. Por ripiti esaki cada 5 ora si acaso ta necesario. Diazepam ta adecua pa pushi y pa cacho. No hasi uzo di Diazepam si bo mascota tin problema renal of hepatico of si e ta na estado y ta na su prome trimester di embarazo! Reduci e dosis si bo cacho bira hopi suf! Percura pa ta presente, pa observa cualkier otro reaccion rapidamente!

Un camisa di presion 

Un camisa di presion tin un presion constantemente suave na e curpa y e tin un efecto calmante na mayoria di cacho cu tin ansiedad, miedo of cu ta hopi activo. Bo por compare cu lora un baby den paña cu ta yora. Recompensa su trankilidad cu algo dushi of cu atencion. Asina aki e cacho por siña trata e camisa cu seguridad. ¿Algun pregunta? Pasa bishita clinica Animal Care Clinic of yama na 582-8382. Tambe por yama Aruba Dog Academy na 5880234. Animal Care Clinic y Aruba Dog Academy ta desea abo y bo mascota un prospero aña 2016!