E aña aki tin surplus atrobe na klapchi riba mercado na Aruba

ORANJESTAD - Benta di klapchi a cuminsa diadomingo, y cu esaki e retonan cu e ta trece cu ne. For di diadomingo, e comision di vuurwerk tin cu controla 81 lugar cu ta bende vuurwerk, pa sigura cu nan ta bendiendo loke nan mester bende y mas importante ainda, cu nan tin loke cu mester di seguridad den nan establecimento. Riba dje, tin un surplus di klapchi, si considera cu fuera di e 18 container di klapchi cu a yega Aruba, tin un total di 7 container ainda di aña pasa, cu ta pone cu tin por lo menos 25 container, yen di klapchi cu lo por wordo bendi e aña aki. Segun experto di explosivo Rubin Ponson, no tabatin echt un coordinacion entre e bendedornan, pasobra nan no ta comunica cu otro di kico tin exactamente. Durante aña tabata tene reunion cu importadornan, pa haya sa kico ta loke mester. Sinembargo e ultimo tempo esaki no a sosode, cu ta pone cu hendenan a ordo sin tene cuenta cu otro. "Entre nan no tabatin comunicacion," Ponson a bisa. Ademas, considerando e free enterprise cu tin na Aruba, e ta dificil pa limita e candidad di importacion cu mester tin. Luis Lu, cu ta propietario di Wayaka Fireworks, a mustra NoticiaCla.com cu e ta cla pa bende, y tin por lo menos 100 diferente asortimento di klapchi. "Mi tin 10 aña ta bende klapchi caba aki na Wayaka," Luis ta bisa. Tin aña ta bay bon, tin aña ta bay menos bon segun Lius. E aña aki a keda cla tempran, cu ta pone cu e chens pa bende mas klapchi, ta mucho mas grandi. Pa ley, por bende klapchi entre 9'or di mainta te 9'or di anochi y e ultimo dia pa tira clapchi ta 1 di januari 2016.