Discurso di Pasco di S.E. Gobernador di Aruba

Discurso di Pasco di Nacemento S.E. Gobernador di Aruba Freddis Refunjol:

Hunto nos ta celebra Pasco di Nacemento awe.

E storia di Pasco ta conta nos tocante nacemento di e yiu nobo, Niño Hesus. Su mayornan tabata huy y nan no tabata bonbini den ningun posada. Y e yiu chikito aki a nace den pobresa den un stal na Bethlehem.

2015 aña despues, ainda e storia aki ta actual y reconocibel, tambe pa nos na Aruba.

Ainda tin angustia, dolor y tristesa na un gran parti di mundo, pa motibo di violencia, conflicto y guera. Nos mester yama Dios danki cu aki na Aruba nos por celebra Pasco den tur trankilidad.

Nos ta celebra fiesta di Pasco hunto, den compania di nos sernan keri y na mes tempo nos ta celebra Pasco tambe den pensamento, hunto cu e cantidad di otro sernan keri cu no por ta cerca nos, tin biaha pa motibo di malesa inespera of pa motibo di morto despues di un bida bendiciona, pero tambe pa motibo di e mala suerte di simplemente di ta na e mal momento na e mal luga, pa motibo di violencia y guera.

Mi ta corda e victimanan inocente di atakenan terorista na mundo henter; e refugiadonan kendenan ta busca un bon refugio y kendenan ta keda malamente saca for di nan cas pa motibo di intolerancia. Frecuentemente leu for di nos “one happy Aruba”, tin biaha tambe hopi cerca.

Manera e storia di Pasco ta siña nos, tambe den tempo di Hesus, paz no tabata algo natural.

Con ta pará cu e paz na Aruba? E marca comercial di nos pais ta “One Happy Island”. “Happiness” no ta un condicion necesario pa e presencia di Paz? Kico paz ta anto? E echo di ta liber di angustia y miedo y tambe un manera di anda hunto pacificamente?

Paz, un bida sin temor y angustia, ta cuminsa na cas, na school, den becindario. Paz ta cuminsa tur caminda cu hende ta biba hunto, ta topa otro, pa medio di un convivencia cu respet pa otro, pa nos prohimo.

Nos organisacionnan di boluntarionan ta ofrece un contribucion importante – tur dia - na nos comunidad na Aruba. For di San Nicolas te Malmok. Pa medio di participacion activo y aporte desinteresa di hopi hende, kendenan dia ‘den dia afo’ ta traha den silencio como boluntarionan pa organisacionnan deportivo, clubnan di servicio, pero tambe percura pa nan famia- y biciñanan. Of cu ta percura pa esnan cu den bida ta menos afortuna of kendenan no por funciona independientemente.

Na e forma aki nos comunidad ta crea oportunidadnan positivo y nos ta percura cu ningun hende keda exclui.

Bon ehempel mester wordo sigui. Un comunidad tin mester di “role-models” : hendenan cu tin un funcion ehemplar pa medio di nan conducta, mescos cu Hesus a haci, pa su discipulonan y pa su siguidonan. Aruba tampoco no por sin su “role-models”. Pa nos hubentud y hunto cu ne, pa nos comunidad den futuro, ta crucial cu nos – nos tur –, ta duna e bon ehempel.

Mas cu nunca nos ta uni mundialmente cu otro, unda cu hende, den tur nan semehansa y diferencia, ta topa constantemente cu otro.

Con nos ta anda cu e diferencianan aki? Con nos ta anda cu hende, cu tin biaha ta parce diferente, cu tambe ta pensa otro, ta actua di forma distinto cu nos ta custumbra.

Celebracion di fiesta di Pasco ta duna nos e oportunidad pa reconcilia, pa discuti diferencianan cu argumento, pa cera paz y pa pone speransa y deseo pa paz den practica.

Cada pueblo mester conserva su pais, specialmente pa e futuro generacionan. Pa nos yiunan y pa nos nietonan. Como sociedad nos mester percura pa un uzo duradero di e rikesanan natural. Con nos ta anda cu nos planeta, cu nos baranca stima. Aruba ta bendiciona cu rikesanan natural: solo, lama limpi, aire fresco, beachnan extenso y un flora y fauna admirabel. Nos Baranca, literalmente y figurativamente, ta carga nos, aki nos ta biba, di dje nos ta biba, aki nos ta biba hunto.

Nos tur, habitantenan di Aruba, ta obliga, pa nos mes y pa nos huespednan, hiba un bon maneho di e rikesanan natural. Pa educa nos generacionnan nobo den esaki. Y aki, - mi a referi na esaki caba -, abo y ami mester fungi como e ‘role model’. Cuida nos Aruba, pa asina nos por traspasa esaki den e mesun bon estado na e generacionnan cu ta bini.

Cada un di nos conoce for di nos bario, e alegria di yegada y nacemento di un yiu nobo, e milager di un bida nobo, oportunidadnan nobo pa futuro. Esey tambe ta e storia di Pasco.

Speransa y oportunidadnan nobo pa un miho futuro pa nos y pa e futuro generacionnan na Aruba, pa paz na Mundo!

Mi ta desea boso tur, tambe na nomber di mi señora y mi famia, un Pasco maraviyoso y un prospero 2016!

Por mira e discurso di S.E. Gobernador di Aruba completo aki