De Meza: Roberto Rincón a yuda gobierno cu contacto cu CITGO

ORANJESTAD – Minister Mike de Meza a admiti, cu e conoce e comerciante Venezolano Roberto Rincón, no awor sino for di 2013. Rincón ta e comerciante, cu siman pasa a keda deteni na Merca pa e.o. labamento di placa y otro soborno. “Den pasado na diferente ocasion mi a topa cu ne,” e mandatario a confirma na NoticiaCla.com, diaranson anochi. E mandatario a bisa mas specifico, cu el a wordo introduci na Rincón den di dos cuartal di 2013, como ‘un comerciante cu a establece su mes na Aruba y tin companianan akinan y tin relacion cu hendenan den top di gobierno Venezolano y PDVSA’. Algo cu segun de Meza, e por a haci bon uso di dje.

RINCÓN TABATIN BON CONTACTO

E contactonan cu Rincón tabatin, segun de Meza, tabata ”algo sumamente interesante” indicando, cu esey tabata bon, pasobra e contactonan anterior cu e tabatin cu Venezuela, pa e intento di reapertura di refineria, no tabata bayendo ‘mes bon’. Pues ora cu de Meza a tende na 2012, cu Rincón tabata na Aruba, el a bisa NoticiaCla.com, cu e mes a pidi un cita cu Rincón pa papia. “El a conta mi di tur e contactonan cu e tin, y cu e por pasa palabra y wak con e contactonan ey por yuda Aruba pa cu e refineria,” de Meza a sigui bisa. E contactonan ey no a keda te ey, sino a keda den contacto ‘iregularmente’, cu Rincón. “Cada bes cu tabatin necesidad di mas informacion, semper e liñanan tabata habri y nos tabata haci uso di dje, pa haya informacion yega na Venezuela y e companianan di Venezuela”.

RINCÓN A YUDA ESTABLECE CONTACTO ENTRE ARUBA Y CITGO

De Meza a admiti tambe na NoticiaCla.com, cu Rincón a participa y yuda establece e contacto entre gobierno di Aruba y CITGO. “E no ta e unico persona. Tabatin mas persona y tur hunto a yuda den esaki. Pero mi no tin cu gaña. E persona aki (Rincón) tambe a yuda gobierno den e contacto.”

NO A TOPA RINCÓN NA HOUSTON PERSONALMENTE

Pa loke ta e situacion cu Rincón ta aden aworaki, de Meza no ta mira esaki como un problema. Esey pasobra gobierno no tabatin un negoshi cu ne. “Nos no tabatin un relacion di trabou cu ne. E tabata un relacion gewoon cu gobierno tin cu hopi hende cu ta duna informacion, inversionistanan kier bisa kico nan kier haci etc. E detayenan nunca nos no a discuti,” de Meza a sigura e portal aki. “Pero di cu nan tabata participa of partner den e negoshacionnan aki, no. Gobierno di Aruba a negosha (directamente) cu CITGO". De Meza a nenga cu elo a topa Rincón na Houston personalmente . “No. Mi tabata topa cu CITGO,” Segun e mandatario a clarifica, cu mientras cu e ta admiti di a topa Rincón na Aruba, e ta duna di kere cu nan no tabata reunionnan personalmente cu Rincón na Houston.“Mi tabatin comunicacion si cu ne na Houston. Mi tabata yam'ele, ora cu mi tabatin mester di un contacto, si e tabata sa di e contacto. Mescos cu mi tabata haci cu otronan,” indicando pues cu su contactonan tabata mas bien telefonicamente. Esaki ta interesante, mirando cu NoticiaCla.com, tin informacion cu e mandatario (hunto cu coleganan mandatario) lo tabata wordo busca pa Rincón, y cu e Venezolano lo tabata anfitrion di nan, durante nan bishita na Houston. Ora cu a sigui puntra riba esey, e mandatario a bisa cu lo tabata buscando cosnan cu no tabat'ey.

ACTIVIDAD CRIMINAL DI RINCÓN

Ademas, segun de Meza, pa loke ta e actividadnan criminal ilegal cu Rincón ta envolvi aden, nan no tabata conoci pa e mandatario. “Nos nunca a wordo informa cu e persona aki ta(bata) wordo persigui. Nos a haci pregunta riba esey, mescos cu hopi otro hende. No tabatin ningun 'warning' pa no papia cu ne, pa no tin contacto cu ne,” de Meza a sigura NoticiaCla.com. A referi tambe na Hugo Carvajal, cu a wordo deteni aña pasa y laga liber despues. “E momento ey nos a puntra atrobe, si e persona aki tambe ta wordo monitoria of tin problema, a bisa no. No tin problema cu ne. Dus nos a haci nos trabounan tambe. Pais Aruba no tabatin ningun zakenrelatie, esta haci business cu e personanan aki,” de Meza a sigui insisti.

CONFIRMACION DI NOTICIACLA

Cu e informacion aki, de Meza ta confirma loke cu NoticiaCla.com a publica mas tempran, e siman aki, riba Rincón, esta di su actividadnan comercial riba e isla, pa cual tambe Rincón segun huez Mericano ta cera aworaki. E motibo # 4, di e documento legal di aresto ta menciona esey. Ora cu NoticiaCla.com a tuma contacto, cu e oficina di e huez, a confirma esaki na NoticiaCla.com cu esey ta un punto enberdad importante, pero cu no kier hustifica e motibo. “E huez no ta bay bisa esey,” e representante di e huez na Houston a sigura NoticiaCla.com diaranson.

ADMISION DI E LINK CU TIN ENTRE GOBIERNO Y RINCÓN

Loke tambe e informacion nobo aki ta confirma, ta e link cu tin entre Rincón y gobernantenan di Aruba, cu a reuni cu ne aki na Aruba, aunke cu gobierno no a haci negoshi directamente cu e persona aki. De Meza a admiti esaki y cu e reunionnan aki tabata no uno, sino varios. De hecho, contrario na informacion anterior, cu e reunionnan no tabata di importancia, ta resulta cu e reunionnan aki tabata di tal importancia, unda cu Rincón tabata instrumental, den establece e contacto entre gobierno di Aruba y CITGO.