De Meza: Aruba porfin ta bira doño di e refineria di Aruba

ORANJESTAD – Porfin Aruba ta bira doño di e refineria. “No un otro,” Minister di energia Mike de Meza, a bisa na ocasion di firmamento di e 'heads of agreement' cu e compania CITGO. E mandatario tabata refiriendo na e hecho cu ora cu keda cla cu CITGO, ta un compania local lo ta doño di e refineria, y no un compania di afo. E intencion segun de Meza ta, pa gobierno crea un compania estatal, cu ta bira doño di e refineria, cu na su turno ta lease e refineria na p.e CITGO.

HOPI RESPONSABILIDAD

E mandatario ta conciente cu esey ta trece hopi responsabilidad cu ne. E ta zona interesante siendo cu gobierno su ‘core business’ no ta pa ‘opera un refineria’. De hecho, e kier a bay pa un epoca completamente ‘berde’. E mandatario di energia a bisa cu lo haci tur intento pa e refineria como tal, bira mas ‘berde’ posibel, den forma di sostenibilidad.

TREK TUR COS RECHT

E intencion ta tambe, fuera di ‘tuma ownership’, pa ‘trek recht' tur e diferente aspectonan cu ‘bo lo kier a mira diferente’. Entre otro e mandatario ta referi na servicionan cu e refineria ta haciendo awor, pero cu mester bira bek di Aruba Ports Authority.

100% OPERA PA HENDENAN LOCAL

Tambe un di e acuerdonan, cu de Meza ta papia di dje, ta cu e acuerdo cu CITGO mester encera cu e refineria mester wordo opera mas tanto posibel, si por 100%, door di nos localnan. “Pa e companianan contratista tambe.” Na momento cu esey no ta posibel, cu tin posibel, lo por busca otro hendenan pa haci e trabou. “Por haci uso di specialistanan di pafo, pero tin cu cumpli cu cierto rekisito y pa un periodo specifico.”