Eman: 'Heads of agreement' cu CITGO mester bira ‘definite agreement’

ORANJESTAD – Conseho di Minister di Aruba, a duna aprobacion diaranson anochi, pa Minister Mike de Meza, firma e ultimo acuerdo proponi y negosha entre gobierno di Aruba y CITGO, pa loke ta e ‘heads of agreement’. Esey tabata e participacion special, cu gobierno a haci diaranson anochi na prensa. E asina yama ‘heads of agreement’ ta ensera e puntonan principal di kico mester bira e 'definite agreement' entre CITGO y gobierno di Aruba. Esey ta nifica, cu a yega mas cerca di e acuerdo final, cu mester keda cla pa fin di maart proximo.

DOCUMENTO SIN COMPROMISO

E 'heads of agreement' manera su definicion mes ta bisa, ta leu si di loke ta un acuerdo final. E ta mas bien un documento sin compromiso, cu ta ensera algun stipulacion necesario. Entre e stipulacion mas principal, ta papia entre otro di kico ta bay ta e impuesto, e fee pa lease e refineria. Ta premira den esey, cu e refineria lo wordo traspasa pa un compania cu ta bira 100% doño di Aruba. “A yega tambe na palabracionnan riba e sumanan di impuesto, como tambe e lease den liñanan grandi. Tambe tin un responsabilidad, cu e refineria tin cu bay opera, den un forma mucho mas conciente di nos medio ambiente. Tambe a papia di e conversion di e refineria riba gas, cu ta reduci emisionnan drasticamente, y e proyecto di algen, cu ta capta e emision di carbon y traduci esaki den un cultivo di algen."

PROCESO CU A CANA

E prome acuerdo tabata e MOU (Memorandum of Understanding) na september 22, y despues a yega na un ‘Notification Letter’ dia 25 di november, cu CITGO a bisa cu nan kier continua e proceso di negoshacion, y 23 di december e acuerdo ta wordo firma entre Nelson Martinez, presidente di CITGO y Minister Mike de Meza.