Hulanda: No lo implementa visa pa Venezolano drenta Aruba awor

DEN HAAG – Teniendo cuenta cu e medidanan, cu tanto Aruba y Corsou a tuma riba e tereno di entrada y expulsion (di pais), no tin razon pa implementa visa pa Venezolanonan aworaki. Asina minister Hulandes pa asuntonan exterior, Bert Koenders, a contesta parlamentarionan Bosman y Ten Broeke recientemente. Mirando e situacion actual di problema cu Venezolano, e parlamentarionan a haci e minister un serie di pregunta riba e tema aki.

DECLARACION DI ODUBER

E mandatario a admiti cu enberdad Minister di Turismo, Otmar Oduber, a declara cu e entrada di Venezolano por wordo frena, cu implementacion di un visa, pero cu esaki lo por tin implicacion serio politico pa nos isla. “Autoridadnan di Aruba a confirma cu e Minister di Turismo a haci e declaracion aki,” Koenders a contesta. 

SOSTEN PARCIAL CU ODUBER

Koenders ta admiti cu declaracion di Oduber, cu e implementacion of cancelacion di un visa  - pa cualkier nacionalidad cu ta - por tin influencia, riba e relacion bilateral cu e paisnan en cuestion. “E bon biahero cu Aruba y Corsou ta ricibi di Venezuela, ta aporta den gran forma na e economia local y ta di gran importancia pa tanto turismo como comercio.” Di otro banda segun e mandatario, cu e implementacion di un visa pa biaha pa e parti Caribense di Reino, lo bira un obstaculo. “ Mes momento (sinembargo) e no ta un garantia cu, debi na e medida ey, lo bin menos bon biahero, of esnan cu tin menos forza di compra,” Koenders ta sigui bisa.

MEDIDANAN MAS ESTRICTO

Koenders ta sigui mustra riba e hecho, cu pa regula e entrada di e Venezolanonan, tanto Aruba como Corsou, a tuma medidanan manera control mas estricto, prome cu drenta e respectivo pais. “Tambe tin palabracion cu e aerolineanan riba e deportacion di personanan cu no ta wordo permiti pa drenta Aruba y Corsou.” Ademas, e mandatario a confirma, cu a discuti e asunto caba cu tanto Aruba cu Corsou, y basa riba esey, a discuti varios opcion pa controla e entrada di e Venezolanonan. Y den e cuadro ey, tambe a discuti e posibilidad pa introduci visa.

ASUNTO DI REINO HULANDES

E mandatario ta subraya tambe, cu e asunto di visa, ta un asunto di Reino, y cu den bon combersacion cu e respectivo departamentonan y paisnan, esaki lo por wordo trata. “E buskeda ta pa tin un maneho harmonisa di visa pa tur partinan di Caribe den Reino.  Lesa e carta aki.