Tur cos ta cla pa ‘VISAGE 2015... remembering ‘85 – 95’

ORANJESTAD – Tur cos ta cla pa e proximo fiesta pa recorda e club nocturno mas popular den añanan 80, esta Club Visage. Diasabra awor riba, di dos dia di pasco, e proximo edicion ta ranca sali den Renaissance Convention Center. Pa varios aña caba e, organisadonan a sa di gara e mercado unico aki, y ta priminti otro lleno total manera ya a bira custumber. Cu e DJ’nan di e tempo ey bek, manera Edson Tromp, Rene Wild y mas, e anochi ta garantisa pa trece e memorianan bek di añanan 80 y 90.

ORARIO

E intencion ta pa inicia e fiesta pa 9’or di anochi y sigui te 3’or di marduga, manera tabata e orario di e club nocturno, cu 20 aña pasa a pasa pa historia ora cu esaki a kima lamentablemente. For di e tempo ey, cada pasa tempo, organisadonan di e evento aki ta organisa un ‘re-encuentro’ entre e grupo grandi di amante di e genero di musica aki.

KEN TA DJ NAN PA E ANOCHI

Dj’nan di e tempo ey tabata e garantia pa un sin fin di musica solido, y esey un biaha mas lo ta e caso. Edson Tromp cu ta e legendario di tur tempo, hunto cu coleganan Rene Wild, Roberto Spencer, Dj Polito, y Kenny O’Mix (cu a bin for di Medio Oriente pa e evento aki), lo percura pa e anochi musical aki. Y cu animacion di e tambe legendario Chando Colina, e anochi solamente falta e publico di e tempo ey, pa haci e anochi completo. Cu e produccion den man di Elite Production & Entertainment, e lo ta un garantia cu e Convention Center lo keda converti den loke tabata Visage e tempo aya.

BENTA DI TICKET

Benta di ticket ta tumando lugar y ta obtenibel na e.o Manuelito’s Sportsbar y No Limit (Mainstreet) y ta bay pa AWG 75 florin general y AWG 125 pa VIP . E forma di bisti, lo ta ‘a la Visage Style, combina cu e ambiente di pasco. En corto, ‘dress to impress’. Pa mas informacion por bai riba e pagina di VISAGE 2015 - event page riba Facebook.