Lo ta mas tolerante pero lo klem auto cu parkeer malo riba dianan di free parking

ORANJESTAD – Personal di Aruparking, lo klem y boet esnan cu parkeer, unda cu nan no ta permiti pa parkeer, aunke cu ta dianan di e free parking. En coneccion cu e dianan di "Free Parking", cu falta ainda ariba 22, 23, 24 y 31 di december proximo, ta recorda, cu no ta permiti pa parkeer den e vaknan geel, ni ariba acera, ni unda no tin vaknan of espacionan, ni unda cu ta stroba visibilidad di e automobilista of peaton, tur locual ta 'fout parkeren'.

MAS TOLERANTE

Di otro banda, Aruparking ta bisa tambe, cu nan lo bai ta mas tolerante den e dianan aki, cu e autonan cu no tin vergunning pa parkeer den e vaknan geel. Bo auto lo haña un sticker y nan lo duna te cu mei ora, despues di e mei ora aki, bo auto lo wordo geklem. 'Foutparkeren', manera ariba acera of unda no tin vak pa parkeer etc., lo wordo sanciona di inmediato pa evita accidentenan. Aruparking ta pidi pa tene bon cuenta cu esaki, pa evita inconveniencia nan innecesario.