Polis a para auto cu chauffeur arma di 18 aña di edad

ORANJESTAD - Tabata dialuna alrededor di 9:10 pm, cu un patruya di polisnan di e team di "Mobiele Eenheid", a topa cu un auto marca Toyota, modelo Tercel, color cora, cu number A-61274, coriendo den un forma sospechoso. Ora polisnan a pasa banda di e auto, mesora e chauffeur a aumenta velocidad, locual a pone cu polisnan a bay su tras y a par'e na altura di e rotonde di Pos Chikito.

ARMA DEN AUTO

Den e auto, polis a topa e chauffeur, di inicial J.A.G.S., naci na Republica Dominicana, di 18 aña di edad. Polis a pidi'e permiso, pa controla den e auto y el a bay di acuerdo. Eyden a topa cu un arma di candela, pa cual a detene e hoben mesora. Un rato despues, e doño di e auto a presenta na e sitio, J.G.L., naci na Republica Dominicana, di 22 aña di edad, kende tambe a keda deteni.

INVESTIGACION RIBA POSESION DI ARMA

Cu e detencionnan aki, awor polis lo investiga e motibo, dicon a actua sospechoso, dicon ta cana cu arma di candela den auto y si por tin cualkier otro acto contra ley, cu e hoben aki lo a caba di comete. Investigacion como tal lo continua.