Polis a detene hobennan arma y cu hopi placa den tas

ORANJESTAD - Polisnan di Noord ta investigando un caso, cu a presenta diamars marduga, pa mas o menos 1:46am, den e parkeerplaats di "The Village Mall", situa dilanti Hilton Resort na Palm Beach. E accion relampago di e patruya, a conduci na dos detencion, cu probablemente lo soluciona un caso di ladronicia di placa.

ACTUACION SOSPECHOSO

E polisnan tabata teniendo un patruya rutinario den e parkeerplaats, ora a nota dos mucha homber, sinta nan so, den un auto marca Toyota, modelo Glanza, cu number A-62247. E auto tabata cendi, pa cual polis a dicidi di bay tira un control. Pero pasando banda di e auto, a haya un holo fuerte di marihuana, locual a conduci cu e polisnan a baha, pa haci un control mesora riba posesion di droga.

CONTROL DEN AUTO

Ora a nota polis, e chauffeur a paga su sigaria di marihuana y a wordo puntra, si nan tin problema pa polis controla den e auto. Asina cu nan a duna OK, a cuminsa controla y den e auto patras, a topa un rugtas color preto cu blanco. E chauffeur a grita mesora, cu e tas no ta di dje. Dor di e mesun reaccion aki, polisnan a dicidi di habri e tas y a topa, cu un arma di candela den dje. Tambe a nota, cu den e tas tabatin, saconan cu placa di papel y saco di plastic cu placa los, mustrando claramente, cu aki por ta trata di "wisselgeld" di un negoshi.

DETENCION

Teniendo cuenta, cu ta trata di dos hoben, humando droga, den posesion di un arma di candela y un tas yena cu placa, ta suficiente motibo pa detene ambos, esta Q.K.A.C y J.A.U.F. Tur dos a keda encarcela pendiente e investigacion, cu awor a cuminsa, conduci dor di recherchenan di Noord. Polis ta lamenta, cu cada bes atrobe ta nota, cu hobennan ta scoge pa e caminda robes, mayoria biaha cu un edad relativamente hoben. Ta haci un apelacion riba mayornan, pa ta mas atento riba nan yiunan, pa cu uzo di arma y pa yega na placa facil.