Automobilistanan sorprendi cu control di trafico 'special'

STA CRUZ- Automobilistanan e ultimo dos dianan aki, a haya nan mes cu un grato sorpresa, durante loke tabata parce control ‘rutinario’ di trafico. Cierto grupo di automobilista, cu tabatin su papelnan na ordo, tabata ricibi un envelop cu 100 florin aden. Un gesto di un compania anonimo, cu kier haci bon den dianan di fiesta. Y cuerpo policial, a tuma e idea cu man habri y ‘hunga Santa Claus’ durante e dos dianan aki. Y manera vocero di polis, Lito Lacle, a conta NoticiaCla.com, hasta lagrima di alegria a cay.

COMPANIA ANONIMO

Segun Lacle, un compania anonimo a acerca KPA recientemente, cu e plan pa parti un suma di 25.000 florin, den 250 envelop cu 100 florin. Polis a tuma esaki cu man habri, y a combina e acto di bondad aki, cu un control regular. Pues e ta yuda tanto polis como e automobilista; ta controla, si ta cumpli cu e reglanan di trafico, tin documento na ordo, y como ‘regalo’, e persona(nan), ta haya e 100 florin den un envelop. Obviamente, e ta un plan, cu inicialmente no a conta cu mucho popularidad. Algo cu a cambia na caminda.

REACCION INICIAL

Lacle a confirma cu e tabatin resistencia. “Hopi biaha polis ta para un persona pa lo peor. Semper e ta algo malo. Awor nan por haya un miho relacion cu polis tambe. Pa loke ta e reaccion, esaki tabata varia di negativo, te ora cu nan habri e envelop. Bo ta wak cierto reaccion di nan y esey ta dunabo e reaccion, cu bo ta haciendo algo bon,” Lacle a bisa. “Tabatin hende, cu awe mainta no tabatin nada di pone na stoma e mainta ey, y nos, cu e placa ey, a logra cu nan por a pone algo na stoma,” Lacle a bisa. Tambe tabatin basta persona, cu a bira emocional, y conta nan historia di kico nan ta pasando aden. “Tin biaha, bo no ta realisa ki cruz hende ta carga, y esaki ta un forma pa porta drecha e situacion,” Lacle a bisa.

MARCO GEERMAN A HAYA PLACA

Un di e automobilistanan cu tambe a ricibi un envelop, Marco Geerman, tabata sumamente contento. “Tremendo!” tabata su prome reaccion pa NoticiaCla.com. “Normalmente ta basta boet mi ta haya,” Geerman a bisa. “Nan tin cu sigui haci'e pa mi 'recover',” Geerman a sigui bisa.

PUBLICIDAD

E hecho, cu esaki no a wordo publica grandemente ainda, ta simplemente pa por tabatin e efecto di sorpresa. Unabes cu e ‘proyecto’ aki caba, e compania lo bin dilanti, pa bisa ken e ta y pakico a haci e gesto aki. “E director di e compania lo bin dilanti y bisa ‘ami a haci esaki’.” Diamars e districtonan di Noord, San Nicolas y Playa a haya y awe a toca Santa Cruz. Entre awe y mayan, ta asumi cu e accion di bondad aki lo termina.