Un di e motibo pa aresto di Roberto Rincón, ta su propiedadnan na Aruba

HOUSTON, TEXAS – Un di e motibonan di consideracion pa detencion di e comerciante Venezolano Roberto Rincón, ta su amistad personal cu ex general Hugo “El Pollo” Carvajal, y e hecho cu e tin residencia na tanto Aruba y Spaña. Den un documento legal, den poder di NoticiaCla.com, por lesa e documento di 5 pagina cu ta motiva e orden di detencion. Y aki ta unda cu Aruba su nomber ta aparece dos biaha. Mes momento, basa riba e cargonan (nan ta varios) cu ta sospecha Rincón di dje, tin castigo di sea bida largo den prison of morto. Basa riba tur e puntonan menciona den e documento, e hues Mericano a rechasa ‘libertad riba fiansa’ y a ordena cu Rincón keda deteni. Esey a keda presenta den corte di Houston, Texas dialuna mainta.

VINCULACION CU MINISTER DI ARUBA

Manera cu NoticiaCla.com a raporta anteriormente, e detencion di Rincón tin implicacion tambe pa Aruba, mirando e vinculo cu e tin cu e isla, y cu cierto personahenan na Aruba. Pa varios aña, autoridad Mericano ta vigilando tur e pasonan di Rincón, cu ta inclui tur hende cu a yega di tin contacto cu ne, reuni cu ne y/of ta involucra den un of otro forma cu ne. Den e caso aki tambe, e ta toca actual gobernantenan di Aruba, cu a reuni cu e persona aki, sea informal of formal (mira e foto), cu ya caba den pasado a keda ‘desmenti’ como ‘un encuentro sin ningun importancia’ y te hasta mustra cu e vinculacion cu kier a haci entre e mandatario (Mike de Meza) y e amigo di Rincón, esta Carvajal, tabata absurdo.

REACCION DI MINISTER DE MEZA

Na juli di 2014, (dia 27 pa ta exacto), den un declaracion pa NoticiaCla.com, e mandatario a reacciona riba publicacion di e potret menciona. Na e occasion ey, Minister Mike de Meza, den un declaracion na NoticiaCla.com a admiti, cu e la reuni cu ex general Hugo Carvajal algun tempo pasa, e ta considera e acusacionnan y insinuacionnan cu ta circulando rond cu su potret, di mala fe.  E mandatario a clarifica e tempo ey, cu for di aña 2009, cu el a wordo sosteni dor di parlamento pa asumi e funcion di Minister y especialmente durante di e ultimo añanan, el a (conhunto cu henter gabinete di Aruba) traha dia y anochi pa crea un posibilidad pa un reapertura di e refineria na Aruba. "E refineria tabata e motor di e di dos pilar di nos economia na Aruba," e mandatario encarga cu energia a declara. "E presencia di e refineria den operacion, ta representa 12% pa 15% di Aruba su economia y ta crea entre 3000 pa 5000 cupo di trabou na Aruba," e mandatario a bisa e tempo ey.

POTRET ‘FAMOSO’

E tempo ey, e enfoke riba e potret, tabata di de Meza y Carvajal, cu riba e potret, ta sinta cu lomba pa e potret. Aworaki, e potret ta bolbe aparece, unda cu e otro persona (banda robez riba e potret), ta Roberto Rincón, cu aworaki ta un homber cera na Merca. Informacion cu NoticiaCla.com tin ta, cu Rincón ta e persona central cu lo a orchestra e encuentronan aki, y cu e ta e homber di contacto entre CITGO y PDVSA y gobierno di Aruba. Intento pa reaccion cu e mandatarionan riba e asunto aki, no tabata posibel awe mainta debi cu e mandatarionan tabata den Conseho di Minister.

FONDO ILLICITO PA COMPRA PROPIEDAD

E hecho cu Aruba ta wordo menciona den e caso di propiedad, ta pasobra ta wordo cuestiona si e propiedadnan aki, ta cumpra cu fondo ilicito obteni via su transaccionnan ilicito pa cual el a wordo deteni aworaki. E tin varios propiedad, manera un serie di apartamento luhoso na Playa, cu ta balora na 1 miyon dollar cada uno.

VINCULACION CU CARVAJAL

Pa loke ta e vinculacion cu Carvajal, ta premira cu esaki ta un intento di autoridad Mericano, pa manda un señal pa Aruba y recorda Aruba (y Hulanda), cu nan no ta contento cu e hecho, cu a laga Carvajal bay, despues cu e tabata deteni riba peticion di propio autoridad Mericano. Y relaciona cu esaki tambe, mirando cu si hera duna Rincón un libertad riba fiansa, e lo por abusa di esaki y hui, y biaha pa Venezuela, manera cu Carvajal a haci na 2014. Y como tal, a ordena pa Rincón keda deteni por lo pronto. Abogado pa Rincón, Samuel Louis, a bisa cu Rincón a desmenti tur cargo, y ta anticipa e reto pa confronta gobierno Mericano, ora cu e caso bin dilanti.

RIKESA DI RINCÓN

Loke a keda revela pa medio di e documentacion di detencion, ta cu hopi placa tabata den wega y hopi placa a pasa den man di Rincón. Tanto placa, cu ora cu e huez inicialmente kier a pone un fiansa di 10 miyon dollar, a nota cu esey ta nada pa Rincón, y a dicidi pa legumay e fiansa. Un total di 730 cuenta bancario a wordo investiga, di cual 108 ta controla pa Rincón, segun e documentonan. E rikesa di Rincón ta riba centenares di miyon dollar, si no ta mas.

CONSPIRACION

Mientrastanto den e documentonan di acusacion di tanto Rincón, como su socio Abraham Shiera, tin 43 pagina di informacion cu ta detaya e conspiracion di e dos personanan aki. E ta cubri un periodo di por lo menos 6 aña, entre 2009 pa 2014, unda cu nan ta wordo acusa di por lo menos 18 delito cu nan a comete. E base di e acusacion ta, cu nan ta wordo sospecha di a uza metodonan illegal pa enrikese nan mes, door di p.e. soborna oficialnan Mericano, tambe di e compania petrolero PDVSA, cu e fin pa obtene contractonan petrolero.

VIGILANCIA TOTAL

Problema ta, cu durante e periodo menciona, autoridad Mericano a investiga y sigui tur pasonan di e dos personanan aki. Esey ta nifica cu tur hende, cu tabata den contacto cu e dos personanan aki, a wordo vigila, entre 2009 pa 2014. Y den e periodo ey, autoridad di Aruba tambe tabata den nan compania, manera e potret mes ta mustra. E no ta un comprobante, pero no ta descarta cu tur esnan vincula cu nan, na e.o. Aruba, tambe tabata wordo vigila durante e periodo ariba menciona.