A redobla recompensa pa e tip di oro pa gara “Yellow”

ORANJESTAD - Ministerio di Husticia, a redobla e recompensa pa tip di oro pa logra detene 'Yellowman'. Aunke cu regularmente tipnan ta drentando na Polis, toch te ainda no a logra haya e tip di oro, cu por a yuda na detene e sospechoso di apodo “Yellow”. Esey a conduci, cu Ministerio di Husticia, Ministerio Publico y Cuerpo Policial Aruba a opta, pa redobla e recompensa di 5 mil florin y haci’e awor un suma mas atractivo, esta di 10 mil florin.

INVESTIGACION

Husticia ta investigando e caso di asesinato y tiramento, cu a sosode dialuna marduga dia 7 di december ultimo, pa cual polis ta buscando e sospechoso principal den e caso aki, esta e homber, Milanchelo Nelson Antonio Trenidad, alias “Yellow”. E ta naci na Boneiro, dia 7 di mei 1985 y ta biba na Cayenastraat # 20 na Aruba. Ta acusa e sospechoso aki di e viola articulo 2:262 c.q. 2:259 di e “Wetboek van Strafrecht van Aruba” y articulo 3 di e “Vuurwapenverordening".

PIDI AYUDO

Ministerio Publico ta pidi comunidad, cualkier persona, cu por sa algo di su paradero, pa informa polis mesora yamando e tipline na 11141. Ta bon pa splica, cu pa por bini na remarca pa ricibi e recompensa, mester yama na e tipline 11141 y laga bo nomber, fam y number di telefon, pa por yama bo bek. Polis ta garantisa, cu e nomber di e informante ta keda anonimo y si polis gara e sospechoso, ta paga. Si e tip ta bon pero no logra gara e sospechoso, lo no duna recompensa tampoco. Esunnan cu no ta interesa pa cobra e recompensa, no mester laga nomber atras e ora.