Skibi carta di 'AO' no ta trabou di docternan di cas

ORANJESTAD – E idea pa stop docternan di cas pa skibi carta di AO diabierna awor, ta netamente di banda di AZV y e asociacion di docternan di cas (HAVA) mes y no di e companianan cu awor lo ta encarga cu e trabou ey. Esey ta reaccion di e director di Medwork esta Ru Croes na NoticiaCla. For di diabierna awo sinembargo, su compania ta un di esnan lo conoce un aumento drastico si di cliente debi na e decision di HAVA. Berdad segun Croes cu debi na e decision aki su compania ta haya un boom economico pero e ta un win win situacion pa tur partido. Esey no ta kita afo cu Aruba ta conoce un industria relativamente nobo. Relativo pasobra e compania Medwork (cu ta un compania ARBO)ta existi for di 2009 caba. ARBO ta e tipo di compania cu ta ‘presta nan mes’ pa duna un servicio na otronan, pa facilita companianan priva. Medwork mes a manda un comunicado unda cu e ta splica e proceso aki. (Lesa e comunicado aki) 

Segun Croes, e trabou primordial di un docter di cas no ta pa skibi carta di ‘AO’ aunke e ta un practica di añanan cu a bira custumber. E ta stroba e practica di por yuda pashentnan di AZV cu mester di ayudo di e docter mas lihe y diferente. Aunke un practica di añanan largo, HAVA y gobierno a purba di para esaki pero no a logra. Ta awor numa a logra cu entrante diabierna awor ta pone paro na esaki. Ademas, segun Croes ta sigui splica NoticiaCla, no ta trabou di un docter di cas pa determina si e persona ta “AO”, ya cu tin mas factor cu solamente malesa. E hecho cu un persona ta bay cu AO, ta debi na factornan social y conflicto di trabou. “Esey no ta wordo atendi pa un docter. Pero un ‘arbo arts’ ta haya un entrenamento special pa mira tanto e parti medico como e parti social. Pues e ta mas integral” Croes ta sigui bisa.

Berdad cu e ta un gasto extra, cu no ta wordo cubri pa AZV, pero de hecho nunca e tabata wordo paga pa AZV segun Croes. E ta un gasto cu e doño di trabou of e trahado mes tabata paga segun Croes. Cada compania registra cu Medwork den e caso aki, Croes ta splica, ta paga un suma fiho pa cada trahado pa luna cu ta varia entre 17.25 pa 19.75, cu ta inclui un pakete completo di servicio. Y un di e servicionan ey ta controla pashent pa nan haya carta di AO. Mientras cu e ta un gasto extra, e ta duna e compania e control miho pa percura pa su productividad por continua y no sufri na man di hendenan cu ta bay cu AO. Pues e ta un situacion beneficioso pa e compania. Ademas, segun Croes, e ta yuda SVB tambe cu sin cu tin mester tabata paga e compania placa, considera como ‘loonderving’, siendo cu e compania tabatin esaki den ‘rood’. Algo cu awor no ta bay ta e caso mas. E ta scapa SVB hopi placa tambe. “Un sistema interesante, nobo, cu tin cu bay sigui desaroya sigur” Croes ta bisa finalmente.