Detencion Roberto Rincón basa riba e.o. su operacionnan na Aruba

TEXAS – E conocido empresario petrolero Venezolano, Roberto Rincón a keda deteni den fin di siman na Texas, Merca, sospecha pa labamento di placa. Mientras cu detayes di e cargonan no ta conoci, fuentenan a revela cu parti di e investigacion riba Rincón, a basa nan mes riba operacion, cu e tabata realisa na Aruba y Merca. Rincón, ta vincula cu e compania petrolero Petroleos de Venezuela (PDVSA) y ex director di inteligencia, Hugo “El Pollo” Carvajal. Ambos tin di haber cu Aruba. Rincón y dos otro persona, lo presenta dilanti corte federal di Houston, Texas, dialuna mainta.

MOTIBO DI DETENCION

Supuestamente Rincón lo a keda deteni, bou sospecho di cu el a viola e sancionnan, estableci pa e oficina di control di activo di extranheria, y pa participa den un red amplio di labamento di placa, di fondo procedente di Venezuela cu ta involucra PDVSA.

RINCÓN NO DESCONOCI PA ARUBA

Rincón no ta un desconoci na Aruba, y de hecho, tabata frecuenta nos isla, y tin algun propiedad, incluyendo residencia, na Aruba. Na 2014, ora cu e ex general Venezolano a yega Aruba, riba un avion priva di Rincón, el a hala atencion di autoridad Mericano e tempo ey caba. Tanto Rincón como Carvajal, tabata busca pa Merca y ta riba peticion di Merca, a detene Carvajal e tempo ey. Pero intervencion Hulandes, a pone cu a laga Carvajal liber e tempo ey.