Corsou den top 10 y Filipinas ta Miss Universo den final dramatico

LAS VEGAS – Un eror di e presentado Mericano, Steve Harvey, a genera un final dramatico na e edicion di Miss Universo 2015. Despues di a anuncia, cu candidata di Colombia, Ariadna Gutiérrez, a bira e ganadora, Harvey a pidi despensa, y cu el a ekiboca su mes y cu e representante di Filipinas, Pia Wurtzbach realmente tabata e miss universo nobo. E certamen a conoce momentonan emocional hopi cerca di cas tambe, ora cu miss Corsow, Kanisha Sluis a yega te den e top 10 di finalista durante e anochi final. Tanto Corsou, como resto di Caribe Hulandes for di e momento ey, a uni nan mes cu Sluis, te ora cu a yega na e ultimo 5 candidatanan.

COMOCION Y TRISTESA

Bek pa e resultado, ambos dama envolvi tabata den un shock. Gutiérrez, miss Colombia, no ta papia ingles, y como tal e no tabata compronde e conmocion inicialmente di loke tabata pasado. Wurtzbach, miss Filipinas, tambe den shock, no tabata compronde kico tabata pasando, y tabata miss USA cu tabata purba splic'e kico tabata pasando.

FAYO DI HARVEY

Loke a pasa despues tabata momentonan di tristesa, shock y asombro. Harvey, splicando cu el a faya den nomber y cu ta su falta y cu e ta esun responsabel. “Mi a comete un fayo. E ta humano. Despensa. No tuma e dos damanan aki na malo. Ta mi fayo,” Harvey a bisa. Rapidamente e miss universo 2014, Paulina Vega, a aparece y a consola su paisana, pa despues kita su corona y pas'e mesora pa e ganadora real esta miss Filipinas.

DOBLE FAYO DI HARVEY

Harvey a sigui comete fayo, ora cu el a bay pidi disculpa riba su cuenta twitter y aki tambe comete fayo, door di skirbi tanto e nomber di Filipinas y Colombia robez. Mesora esaki a keda kita pa despues e pone un mensahe nobo, e biaha aki cu e mensahe corecto.

CORSOW DEN TOP 10

Aruba su presentacion tabata bunita, pero no suficiente pa logra cay den finalista. Corsou di otro banda, si a logra drenta den e prome 15 finalistanan. A nota riba rednan social, cu tanto Corsow, como resto di Caribe Hulandes a explota den euforia. E tabata un ‘new ballgame’ e ora, y mas interes a lanta pa sigui wak e certamen. Pero ora cu Kanisha Sluis, a logra penetra den e top 10, esey tabata un momento di locura total. E sintonia local a aumenta drasticamente, cu e momento ey. Lamentablemente Sluis no a logra penetra den e top 5, aunke su presentacion caba, tabata seya como un exito gigantesco. Ultimo biaha cu un reina di nos islanan a yega asina leu, tabata na 1996 ora, cu Taryn Mansell di Aruba, a sali prome finalista, tambe na Las Vegas.