Beatrix cu elogio pa yiu di Corsou Smit cu a interpreta ‘Juliana’ den obra

AMSTERDAM – E yiu di Corsou Paulette Smit (58), a score cu su presentacion como Princesa Juliana na Amsterdam den e obra teatral di John Leerdam, 'Juliana, moeder van het volk'. Un obra di Stichting Julius Leeft. Invitado di honor, Princes Beatrix, a goza inmensamente y tabatin palabra di elogio pa Smit na final. Smit a splica NoticiaCla.com, cu el a ricibi un compliment personal di e princesa. “Loke mi a gosa, (ta) cu Prinses Beatrix a cana mesora cerca mi y e di ‘wat heeft u dat prachtig neergezet’,” Smit a bisa NoticiaCla.com. Leerdam a bisa NoticiaCla.com cu si Aruba invita, nan lo haci e presentacion na Aruba tambe.

OBRA

E presentacion tabata tanto diasabra como diadomingo, den e Stadschouwburg di Amsterdam. E obra ta trata e relacion cu Princesa Juliana tabatin, entre otro, cu Surnam, y e amor cu Princesa Juliana tabatin pa e pais ey. Aunke cu su mama, Princesa Wilhelmina, a desconseh’e di bay, Princesa Juliana a bishita Surnam na 1955.

FUNDACION JULIUS LEEFT

Fundacion Julius Leeft, a keda funda 10 aña pasa pa John Leerdam, pa den forma teatral, mustra e puntonan positivo y negativo di e relacion entre Hulanda y e ex colonianan Hulandes den Caribe. Cada aña tin un obra, cu ta wordo presenta solamente den forma limita. Cinco aña pasa e tema tabata Principe Claus. Pa e di dos lustro, a scohe pa Princesa Juliana.

EXPERIENCIA PA SMIT

E experiencia personal pa Smit tabata grandi. “Loke mi a gosa cu Prinses Beatrix a cana bini mesora cerca mi y e di ‘wat heeft u dat prachtig neergezet!” Smit a bisa. “Despues nos mester a saca potret, el a cana bin atrobe y di 'ik wil naast mijn moeder staan’. Esaki mi a tuma como un compliment grandi. Mi curpa a coi ril,” Smit a confia na NoticiaCla.com.