Carga balora na 7.2 miyon florin na droga confisca na Corsou

WILLEMSTAD - Duana durante di un control na un empresa di transportacion di mercancia a controla un container destina pa St. Maarten. Durante di e control aki efectivonan di Duana a nota algo straño cu e cargamento. Esta cu balor di e mercancia no tabata cuadra cu gastonan di transportacion pa e container por a yega su destinacion.

Mes ora e selador atento aki a tuma contacto cu hefe di e departamento di investigacion di Duana cu a ordena pa e container ser traslada pa Nieuwe Haven. Una bes na Nieuwe Haven un control intensivo a ser hasi di parti di Duana riba e mercancia en cuestion pero sin ningun resultado positivo. Locual si cu Duana a nota ta cu e bandanan di e container no tabata intacto. Esei a pone cu mester a intensiva e control riba structura di e container caminda a bin nota mas desviacion cu tabata duna indicacion cu esaki por tabatin banda falso.

Despues di a retira e banda falso di e container Duana a bin topa cu pakinan cu aparentemente por tabata contene droga. Despues di a test y inventarisa contenido di e pakinan a resulta cu esakinan tabata contene mas o menos 600 kilo di cocaina. E droga confisca aki por tin un balor riba kaya di mas o menos 3 miyon Euro o aproximadamente 7.2 miyon florin Antiano. Division di Crimen Organisa di Polis a keda encarga cu e investigacion mas aleu di e hayazgo aki. Fotonan e informacion cortesia Yves Cooper.