Opcion NO a vence den e Referendum di Bonaire

KRALENDIJK - Pueblo di Bonaire a vota masalmente pa e opcion NO den e referendum di diabierna. Cu un total di 4264 voto (faltando un lokaal mas cu 2353 voto), contra 2037 voto (faltando un local ainda), e opcion NO a vence riba e opcion SI. Ni si tur e votonan di e ultimo local drenta, e lo a haci un diferencia mas. For di comienso di e anochi, unabez cu e votonan a cuminsa drenta, tabata notable cu NO a coi un delantera for di comienso. Y rapidamente e delantera a sigui crece y ya na 50% di e votonan conta, tabata practicamente un hecho, cu e opcion NO tabata e ganador. Lider politico di MPB, Elvis Tjin Asjoe, no obstante cu el a vota pa SI, y a core campaña fuerte pa e opcion SI, a bisa durante e curso di anochi, cu toch Bonaire a gana. Esaki pasobra hasta contrincantenan cu a vota NO, lo a bisa den curso di diabierna, cu nan no kier sali for di Hulanda. Diputado pa partido Democrat, Clark Abraham, a mustra cu el a vota pa e opcion NO, pasobra durante e ultimo aña cu el a drenta gobierno, hopi di e cosnan cu nan kier a logra, y cu pueblo kier a logra, tabata hopi dificil den e forma cu cosnan ta awor. Y awor cu e logro di diabierna, por renegosha e contenido cu tin aworaki pa loke ta e situacion di Bonaire. 

REFERENDUM

Awe, pueblo di Bonaire mester a laga sa, si nan ta sigui cu Hulanda manera cu e contenido ta awor, y mas importante, si nan ta di acuerdo, cu e manera a duna contenido na laso directo cu Hulanda, for di 10-10-2010. Riba esaki, e pueblo por vota solamente SI of NO. Esnan cu vota SI, ta nifica cu nan ta di acuerdo, pero esey no ta nifica, cu semper nan tabata di acuerdo cu tur cos. Si vota NO, kiermen cu no ta di acuerdo, cu e manera cu a duna e contenido na e laso cu Hulanda.

CONSECUENCIA DI OPCION

E opcion, cu tin mas consecuencia obviamente, ta esun NO, unda cu esey lo nifica, cu gobierno di Bonaire, tin cu bay negosha cu Hulanda riba un forma nobo, con lo bay duna contenido na e laso directo cu Hulanda. “Tuma nota cu e laso directo cu Hulanda no ta topico di negosacion cu Hulanda,” segun e website di e referendum. Den e caso di un NO, tambe gobierno Hulandes ta keda, por lo pronto, responsabel pa Bonaire. Tampoco un posibel paro, di entre otro ayudo, no ta al caso e ora ey.

RESULTADO 

E resultado di e referendum tin solamente nificacion interno pa Bonaire. No a fiha un porcentahe di cantidad di hende, cu mester bay vota pa e referendum ta valido. Esey no tin un efecto riba e valides di e resultado. Loke ta importante ta, cu ta trata di un votacion liber pa adultonan di e pueblo. Den e caso, cu por ehempel 40% di hende cu derecho di voto a vota, un cantidad di menos cu mitar di esaki, por ta decisivo. Por lesa e resultado completo di e referendum aki aki.