Ruiz: “No ta palabra malo mi a papia, no ta insulto mi a lansa “

ORANJESTAD – Un dia despues, cu Presidente di Parlamento, Marisol Lopez Tromp, a pidi pa Parlamentario Ruiz, bandona sala di parlamento pa motibo di su actuacion, Ruiz a reacciona publicamente. Segun Ruiz, durante e reunion publico, pa trata e presupuesto supletorio 2015 di Pais Aruba, e por a experencia un otro abuso di poder di Presidente di Parlamento, na unda segun Ruiz, Lopez recuri pa sac'e como parlamentario di oposicion di pais Aruba, for di sala di Parlamento haciendo uso di e man duro di Polis. “Esaki ta otro prueba cu Presidente di Parlamento ta malusa e poder cu e stul ta dun'e pa asina purba stroba y silencia oposicion. Pero e mundo aki ta lora y poder lo caba. E Presidente di Parlamento por a saca mi afor, pero e no por silencia e voz cu ta resona pa bisa e berdad.” Ruiz a bisa den un comunicado.

TILDA DI GROSERIA

E motibo pa cual, segun e Presidente di Parlamento Lopez, a recuri na Ruiz for di e reunion di Parlamento, ta pasobra cu Ruiz lo tabata grosero. “ Esaki ta un motibo hopi zwak cu e presidente a recuri na dje, ya cu mi persona no a uza ningun palabra malo den su direccion y tampoco den direccion di ningun hende presente den Parlamento. Alcontrario, mi a trece e berdad dilanti, cu kizas Minister Dowers, Minister Eman of e Presidente di Parlamento no kier a tende. Pasobra ora Minister Dowers ta bin tilda nos Lider Evelyn y nos fraccion di gañado, ta na su lugar, pa corda e mandatario aki, cu e unico gañado den e sala di Parlamento ta Minister Mike Eman. Si bisa e berdad aki ta groseria, anto ‘so be it.’ Mihor nos wordo tilda di ta grosero, bisando e berdad, cu ta traidor di e Pueblo aki, tapando e berdad,” Ruiz a bisa.

NO POR SILENCIA E VOZ CU TA BISA E BERDAD

Segun Ruiz, ta remarcabel cu henter e reunion, bo ta haya esnan di AVP ta abusa di e parlamentarionan di oposicion, pero contra nan e Presidente di Parlamento ta uza man cu handschoen di felpa. “Asina cu toca turno na oposicion, presidente di Parlamento su manera di midi y interpreta ta cambia”. Segun Ruiz, e biaha aki e presidente hasta a bay asina leu, pa recuri na uso di e man duro di polis, pa saca parlamentario di oposicion pafor di sala di Parlamento, sin cu e tin un motibo valido pa recuri na tal extremo. “No ta palabra malo mi a papia, no ta insulto mi a lansa y no ta bringa mi a bringa. Ta e berdad mi a bisa. Con cu bay bin, e presidente por wel di saca mi afor, pero e NO por silencia e voz cu ta resona pa bisa e berdad.”