A pone un hulpbestuurskantoor y edificio di OM na benta awe

ORANJESTAD – Gobierno awe a pone dos edificio na benta, cu e intencion pa haya fondo pa yuda cubri nan gastonan pa 2015. E plan aki ta cuadra cu e plan den presupuesto 2015, unda cu ta stipula cu lo bende algun propiedad (edificio) di gobierno, generando placa pa por cubri cierto buraco. Un idea cu no a goza di aprobacion cerca e colegio di supervision financiero, CAFT, e siman aki. Segun e presidente di CAFT, Age Bakker, gobierno ta uza medidanan adhoc, pa soluciona un problema financiero structural. Mientrastanto awe gobierno a informa, cu lo pone tanto edificio di ministerio publico como hulpbestuurskantoor na benta.

AVISO DEN MEDIO

Den avisonan den medionan di comunicacion, ta menciona cu e suma cu ta pidi pa e edificio di ministerio publico (Havenstraat of Klipstraat 2) ta wordo bendi pa 4.4 miyon florin, mientras cu e edificio di hulpbestuurskantoor, lo bay pa 816 mil florin. Esey ta e prome dos di un total di entre 4 pa 6 edificio, cu gobierno a pone riba presupuesto, di lo kier bende pa genera cierto fondo pues, pa cubri gasto.

REUBICACION DI EDIFICIO?

Mientras cu e personal di Hulpbestuurskantoor ta wordo re ubica den e edificio multifuncional na Noord mes, no ta conoci unda e personal di ministerio publico lo bay. De hecho, ora cu e personal a wordo acerca mas tempran e siman, a compronde cu nan no tabata na altura di e intencion di e benta di e edificio, ni unda nan lo mester a muda bay. Vocero di ministerio publico no tabata disponibel pa comentario awe mainta.