KvK: Aumento salario minimo kiermen medida pa comercio

ORANJESTAD – Gobierno di Aruba ta introduci un aumento di salario minimo na 2016 di 2.5%. Esaki, e prome mandatario Eman a anuncia durante tratamento di e presupuesto supletorio 2015 den parlamento diahuebs anochi. Gremionan mesora a reacciona riba esaki, y e resultado no tabata positivo. Camara di Comercio por ehempel, mientras ta compronde e pensamento, tin problema cu gobierno a desvia di e conseho di Sociaal Ecnonomisch Raad (SER), cu a sugeri apenas 1%.

GESTO NOBLE PERO..

“(Camara di comercio) A tuma nota di minister presidente (Eman) su declaracion, encuanto cu lo no introduci medida, pero si lo introduci aumento di salario minimo. Mientras ta compronde cu ta un gesto noble y cu e deseo ta pa por aumenta e poder di compra, locual riba su mes no ta nada malo, pero dicon lo kier desvia di conseho di SER y surpasa locual a wordo conseha? SER lo no ta bon informa of altanto di e situacion actual?” presidente di Camara di Comercio, Daphne Lejuez a bisa.

AUMENTO SALARIO MINIMO TA MEDIDA PA COMERCIO

Segun Lejuez, kizas minister presidente no ta realisa cu aumento di salario minimo, ta wordo considera como un medida pa comercio, ya cu e ta wordo considera como un aumento den e 'cost of doing business'. “Aumenta salario minimo tambe ta implica, cu lo paga mas na sociale lasten (SVB, AZV, pensioen, loonbelasting etc) ya cu tur ta porcentahenan cu ta mara na salario. Dus e ta un beneficio real? Y pa ken? Y con comercio na su turno lo tin cu anda cu e gasto aki pa su negoshi? Absorba esaki of bereken e door na consumidor? Dus 'bottom line' e ta un beneficio real?” Lejuez ta sigui bisa.

LAMENTA DECISION POPULISTA

Camara di Comercio ta sigui mustra cu nan ta hay'e lamentabel, cu varios gobernante ta scohe e opcion populista di duna aumento di salario minimo y/of hasi promesanan di entradanan (no confirma) na comunidad, pa asina por crea division entre comercio, sindicato y comunidad pa na su turno, por desvia atencion for di nan propio maneho financiero y falta di auto- disciplina den analisa y corta gastonan necesario y proyectonan sin prioridad di gobierno.

GOBIERNO TA BAY CONTRA CONSEHO

“Contra un gran cantidad di conseho, incluso ultimamente di CAFT, gobierno sinembargo ta keda inactivo den reduci su propio gastonan - kico lo por ta e resultado di esaki a corto y largo plaso? Con esaki lo afecta e BBA (Balanced Budget Akkoord) cu a wordo firma door di tur minister? Reapertura di refineria lo reduci of soluciona e deficit di nos pais?” Lejuez ta finalisa bisando.