ATIA: Aumento salario minimo ta aumenta gasto di haci negoshi

ORANJESTAD – E decision di gobierno pa anuncia aumento di salario minimo na 2.5% na 2016, no a cay den bon tera serca e gremio comercial ATIA (Aruba Trade and Industry Association). Segun su Presidente Michel Henriquez, “Esaki ta otro ehemplo di con gobierno no ta tuma advies di ningun instancia na serio, sea ta CAFT, Raad v Advies, of SER”. Asina Henriquez a reacciona pa NoticiaCla.com awe mainta. Tabata ayera nochi, cu gobierno di Aruba a informa cu ta introduci un aumento di salario minimo na 2016 di 2.5%. E prome mandatario Eman, a haci e declaracion durante tratamento di e presupuesto supletorio 2015 den parlamento diahuebs anochi.

CON GOBIERNO TA ANDA CU CONSEHONAN

Henriquez tin un problema, cu e forma con gobierno ta trata e consehonan, cu e ta haya di tur e instancianan oficial. “ Si nan no gusta e advies of e resultado no ta na nan beneficio, nan ta haci locual nan ta kier na final,” Henriquez a continua bisando. Segun e presidente di ATIA, den e caso aki desde July caba, gobierno kier a hisa e minimum loon sin tin justification economico pe.” E inflation ta minimo y toch kier subi’e 2.5  pa baha e inflatie cijfer. “No tin motibo valido pa cu esaki, pesey SER a duna e advies di 1%,” Henriquez a recorda NoticiaCla.com. “Gobierno un biaha mas, ta hinca man den cartera di comercio y ta subi e 'cost of doing business' sin por hustifica esaki,”  Henriquez a finalisa bisando.