Fin di siman di pasco y nos festival di dande

ORANJESTAD – E tiramento di lot, pa Festival di Dande 2015, a bay masha ameno y e weekend aki, lo tin un ambiente di Pasco den Paraiso, riba Plaza Turismo. Diabierna 18 di december, lo tin den un ambiente di pasco cu cuminda, cos dushi, artesania di pasco y mas riba Plaza Turismo. Animacion cu musica di gaita, lo ta den man di Paranda Ta Nos, Arugaldo, Grupo Fortaleza, Grupo Melodia y Los Paranderos. Diasabra 19 di december, lo tin mas ambiente di fin di aña, cu animacion di musica di gaita di Sparkle cu Briyo, Los Paranderos y Maruba. Ambos dia cu bar y cushina bon surti.

LISTA DI GRUPO

Pa Diadomingo 20 di december venidero, nos ta haya e festival di dande 2015, cu un total di 15 agrupacion tipico; Tipico Savaneta, Tipico Lus di Luna, Tipico Sabroso, Tipico Un Famia, Paranda ta Nos, Sonido di Antaño 1, Tipico Alegre Noord, Sonido di Antaño 2, Robert y su Alma Folklorico, Tipico Ainda Falta, La Bomba, Tipico Alegre Kadushi Largo, Tipico del Campo, Inspiracion Folklorico, y Buleria. Un total di 36 cantante di Dande lo tin y Aruba lo bay conoce su ganado di Festival di Dande 2015. Pa Composicion Tipico lo tin un total di 10 cancion tipico. Nan ta den ritmo di Aguinaldo, Danza, Tumba, Wals, y Tambu.