Dept Salud cu alerta pa medicina y estetica ilegal

ORANJESTAD - Departamento di Salud Publico, a emiti un alerta pa medicina y estetica ilegal. E departamento seccion "Juridische zaken en Inspectie zaken", a nota e ultimo tempo, cu tin diferente keho of peticion pa asistencia, relaciona cu practicanan di estetica cu a bay malo y consecuentemente, a causa daño, cu hopi biaha no por wordo remedia mas. E cantidad di casonan cu nan ta atende cun’e ta “the tip of the iceberg” y ta e hendenan cu a bira echt malo. 

PARTI CHIKITO

E ta un parti chikito, di e total di casonan y tambe ta trata di e pio casonan, y lo mester tin hopi mas hende den nos comunidad, cu ta cana cu complicacion of problemanan causa pa medicina y estetica ilegal, cu no ta haci keho of indica un mal trabao na Departamento di Salud Publico (DESPA), segun Jayburtt Dijkhoff di Departamento di Salud Publico.

MEDICINA ESTETICA ILEGAL

Dijkhoff ta referi na e practicanan como “medicina estetica ilegal”, subrayando cu esakinan ta practicanan peligroso. El a splica cu tin diferente hende, cu ta acerca cliente, nan ta pretende di ta certifica door di DESPA, nan ta mas barata y hasta ta bisa cu nan ta registra na Departamento di Salud Publico, cual no ta e caso. E tipo di practicanan cu nan ta haci tin hopi risico. Estetica ta algo cu un cirujano plastico ta haci, e specialista medico aki a studia seis aña y despues a specialisa su mes pa por haci tur tipo di tratamento y operacion, e tin e conocemento y e capacidad pa haci e trabao, Dijkhoff a bisa. Tur medico tin e obligación di brinda servicio medico di calidad responsabel.

UNDA CU NAN TA TRAHA

E hendenan cu no ta certifica, ta traha for di un cas, of ta bishita cas di e cliente, of nan ta traha for di un camber di hotel. Esaki ta peligroso, y practicanan di medicina estetica, mester tuma luga na un clinica of un hospital, Dijkhoff a indica. Particularmente ora cu e persona cuminsa papia di hangua, ya ta algo cu no ta bon. E palabra “hangua” so caba ta un “red flag” sigur.

PERSONANAN NO CERTIFICA

El a splica, cu e persona cu ta laga hendenan no certifica door di DESPA, administra cualkier “tratamento”, hangua, operacion, of remedi cu nan ta core e risico tambe, cu despues lo tin consecuencia medico (di salud), económico (hopi gasto) y social (ken lo paga pa e daño).

DESPA TA CERTIFICA PROFESIONALNAN

Departamento di Salud Publico, ta certifica profesionalnan, cu ta cualifica di berdad, pa asina garantisa un cierto nivel di protección pa comunidad, Dijkhoff a bisa, añadiendo cu un hende certifica, tin conocemento suficiente pa por administra cierto tratamento.

TRAHANDO DURO PA INTRODUCI ARUBIG

Actualmente e departamento ta trahando duro pa introduccion di AruBIG, cu ta e ley bao di cual tur dokter ta cay. Ademas, ta trahando riba un maneho pa beauty salon, tattoo parlor, y e tipo di negoshinan unda cu un nivel haltisimo di higiena ta necesario y tratamentonan cu por resulta den problemanan di salud pa e cliente ta wordo ofreci.