Famia di Mia: Lo crema curpa y transport’e pa Republica Dominicana

ORANJESTAD – Famia di Mia Benscome Ortiz a dicidi, cu lo laga crema curpa di nan yiu Mia, y transporta e shinishi pa Republica Dominicano. Un conferencia di prensa, programa pa diabierna mainta, a keda cancela tambe. Motibo di e decisionan final ta pasobra, “e famia no por keda sigui cu e situacion doloroso aki, sin cu ni sikiera nos por a dispone di e curpa di Mia,” e famia a laga sa, den nan di dos carta habri e siman aki riba e caso.

DUDA TA KEDA

E famia ta mustra tambe, cu ainda nan tin duda y nan lo continua cu e dudanan aki, ya cu e escena unda nan yiu muhe a wordo haya morto, no ta cla. “Pero Mia cu ta esun cu sa kico berdaderamente a sosode... no t’ey mas. E echo aki, ta uno duro y doloroso pa nos durante henter un siman. Nos ta sinti nos mes cansa, no solamente nos famia aki na Aruba, pero nos famia na Republica Dominicana tambe,” e famia ta sigui bisa den nan carta publico.

CREMA CURPA

“P’esey nos a dicidi cu nos ta bay crema e curpa di nos ser stima, Mia. Nos ta bay confia den e evaluacion forence cu a wordo haci na Aruba. Si ta existi algun culpabel, y si berdaderamente e caso di Mia no ta un suicidio, Dios ta bay yuda nos pa aclaria.” Segun e famia, pa tal motibo nan a tuma e decision aki pa e dolor y e costo cu e situacion aki a ocasiona pa nan. “ Si berdaderamente lo bin un caso, nos lo continua esaki den futuro. Pero actualmente nos ta considera cu mas dolor ta produci mas dolor so.”

DUDANAN

Segun e famia, nan tin nan dudanan, pero nan no tin nada cu lo por aclaria nan dudanan, mas cu e Fe cu nan ta mantene den Dios. “Nos kier bisa, cu si den henter e proceso aki ta resulta cu nos ser keri Mia a comete suicidio, nos ta pidi pordon na Dios p’e. Nos ta pidi tur hende nan comprension cu nos. Esaki ta un echo realmente doloroso. Pa tal motibo nos a dicidi di no haci niun acto di condolencia y tampoco niun acto di entiero na Aruba, pa e echo con tur cos a sosode rond di e caso di nos Mia stima.”

GRADICIMENTO

Y finalmente e famia ta manda nan palabra di danki pa e sosten. “Nos ta expresa nos palabra di danki, na tur hende cu a sostene nos den nos dolor y den nos lucha, pa un investigacion mas profundo lo por a tuma luga. Specialmente nos ta gradici prensa di Aruba en general, cu semper a sostene nos pa tur e situacion cu nos a pasa aden, y pa tur cos cu nos a yega di expresa.”

BIDA DI MIA

Si no ta asina cu Mia a comete suicidio, Dios lo bay yuda nan pa haya e porta pa descubri e berdad. “Nos ta gradici e tempo cu nos a yega di biba cu Mia. Nan tabata 20 aña di locual e ultimo dos aña, el a dicidi di biba su so cu su partner. Nos a respeta su bida personal. Pero prome cu esey, nos tabatin e placer di por a comparti y stima Mia. Nos como famia ta totalmente kibra, y nos ta pidi disculpa na Mia su amigonan, pasobra nos no tin forsa pa comparti, cu niun hende nos dolor, debi na e situacion cu nos a pasa aden,” e famia ta finalisa bisando.