Ta teme pa bida di homber cu a cay na Valero marduga

SAN NICOLAS – Un trahado di Valero cu a cay for di un lifter marduga, ta bringando pa su bida. Vocero interino di polis, Liliana Rasmijn a confirma pa NoticiaCla.com, cu su situacion ta hopi critico. Den careda di 2’or di marduga, centrale post a haya melding cu e homber Arubiano (58) di fam F, a cay for di un lifter (trapi hidrolico) ora cu e tabata trahando riba un barco na waf di Valero. E cabuya a kibra y bin abou cu ne cu e presion.

SITUACION MEDICO TA CRITICO

Segun Rasmijn, e persona aki a kibra su craneo, cacumbein, su man y su dos pianan. “E ta hopi critico den ICU (Intensive Care Unit), y ta teme pa su bida,” Rasmijn a sigui bisa. Lo ta trata di un persona, cu tin hopi tempo ta traha na e refineria. Keda pendiente pa mas informacion.