OM: Ningun pista ainda di e fugitivo “Yellowman”

ORANJESTAD – Ainda no tin nada riba e buskeda di e fugitivo “Yellowman”. Segun vocero di Ministerio Publico, Ann Angela a bisa NoticiaCla.com awe mainta, e buskeda ta continua. “Ayera polis a bishita un cas pariba di brug. Nada,” Angela a bisa. Ademas, polis a listra areanan completo, sin ningun exito. E buskeda ta continua, pero no tin nada ainda y ningun detencion a tuma lugar te cu awor.

PETICION PA TIP DI ORO

Siman pasa Fiscal Mayor di Husticia, a saca un recompensa di 5.000 florin, pa e tip di oro, cu lo hiba na detencion di e sospechoso: Milanchelo Trenidad (30) den e morto violento, di e bouncer di Olde Molen, riba 7 di december ultimo. E homber Milanchelo Nelson Antonio Trenidad, conoci tambe bou su alias ‘Yellow’, ta naci riba 7 di mei 1985, na Bonaire y ta biba na Aruba. E ta wordo sospecha, di a los tironan dialuna mainta (dia 7 di december) tempran na Olde Molen, caminda un bouncer, a fayece y un otro a resulta gravemente herida. Si bo ta dispone, di informacion cu posiblemente por hiba na soluciona e caso aki, por favor tuma contacto cu Polis. Bo por yama senjor C. Muller na Recherchebureau Shaba na Noord (tel. 563-5391). Eventualmente, Bo por yama tiplijn tambe na 11141 y duna bo informacion. Lo bo wordo yama back.