Corsou ta destinacion mucho caro pa e Arubiano frecuenta

ORANJESTAD – E interes di Arubianonan pa bishita Corsou, a cay den 2015. De hecho, segun Director di Oficina di Turismo di Corsow (CTB), Hugo Clarinda, no a mira un crecemento compara cu e añanan anterior. Y segun Clarinda, parti di e problema ta e tarifa halto cu aerolineanan cu ta bula e ruta, ta cobrando e pasahero(nan). “Tin asina tanto oferta na Aruba actualmente, pa hende bay vakantie, cu tarifa hopi atractivo, cu pa un Arubiano paga mes hopi pa e bay Corsou, e por paga pa bay Miami of otro destinacion,” Clarinda a bisa. Como tal, hendenan no ta scoge mas asina tanto pa bay Corsou cu e mesun frecuencia cu antes.

ATRACTIVO PA EVENTONAN SPECIAL

Esey no ta kita afo cu e oficina di turismo no ta kere mas den e mercado di Aruba. Tin un cantidad toch basta grandi cu ta bin Corsou. “Nos ta kere cu door di haci mas esfuerso, vooral ora di eventonan special, nos ta target e mercado Arubiano.” E ta haci mencion manera drag race y North Sea Jazz, cu ta hala hopi hende. Ora tin evento, tin hopi hende di Aruba si. Mientras cu Clarinda no por duna un cifra exacto, e cantidad a baha sigur cu algo mas cu 10%, cu ta traduci den un par di mil hende. “E ta basta!” Clarlinda a sigui bisa.

GASTONAN PA BULA PA CORSOW TA HALTO

CEO di e aerolinea Aruba Airlines, Onno de Swart, ta comparti e opinion di Clarida. Y como ehecutivo di aviacion, e ta splica tambe pakico e tarifa entre Aruba y Corsou ta hopi mas caro. “E gastonan operacional tanto na Aruba, como na Corsou ta mas halto. E tempo cu bo ta cumpra un ticket pa 100 florin, a pasa. Pero nos a haci nos best pa toch bin cu un tarifa cu a cay na agrado di un y tur,” de Swart ta bisa. E hecho, cu nan prome buelo comercial diaranson tabata yen, ta un muestra di esey. Y ora cu de Swart papia di tarifa mas abou, e ta papia di tarifa manera bou di 300 florin incluyendo impuesto. “Esey e lo keda por lo pronto.” Ademas el a bisa, cu a haya un formula pa e tarifa keda asina abou, aunke e no a bisa kico e formula ey ta, ni cuanto tempo e tarifa lo keda bou di 300 florin.

DESTINACION VS DISTANCIA Y PRIJS

E prijsnan segun de Swart, ta subiendo dobel awor aki, pues no ta bira atractivo mas pa bay un destinacion di 20 minuut. “Bo ta cuminsa pensa riba un destinacion mas grandi, biaha menos, pero un vakantie mas pa relax. Pa bo bay un biahe di 20 minuut den weekend, pa un weekend manera North Sea Jazz, bo ta cuminsa pensa dos biaha,” de Swart a sigui bisa. Compara cu un pasashi cu otro aerolinea awor, esaki ta sigur 150 pa 200 florin mas barata. Un pasashi pa Corsou awor aki ta costa entre 417 pa 448 florin, incluyendo impuesto. Pero aworaki, tin descuento di te 250 florin pa e mesun destinacion pa un periodo. Foto cortesia Monniac.