Lejuez: Comerciantenan kier nan propio organisacion envez di OBID

ORANJESTAD – No obstante e hecho cu tin un organisacion pa maneha e centro di ciudad, OBID (Oranjestad Business Improvement District), comerciantenan kier lanta nan propio organisacion. Presidente di Camara di Comercio, Daphne Lejuez, durante nan ultimo conferencia di prensa e siman aki, a declara na NoticiaCla.com, cu OBID ta un iniciativa netamente di gobierno, den cual gobierno ta esun cu ta carga e responsabilidad y ta funda esaki. “No tin e comerciantenan stakeholder den dje,” Lejuez a sigui bisa. “E ta wordo completamente maneha pa miembronan di gobierno y/of su departamentonan. Akinan e comerciantenan mes a opta, pa bay busca un manera pa lanta nan propio organisacion,” Lejuez a continua bisando.

DEFINICION DI OBID

E definicion di OBID ta netamente loke e nomber ta bisa, y cu tin cu inclui tur comerciante y stakeholders den dje (pa e tin e efecto necesario). “Den e caso aki, a opta pa pone esaki (OBID) riba payroll di algemene zaken (cu ta e prespuesto cu ta cay bou di Minister Presidente di Aruba), y/of (ta wordo) 'gerund' pa departamento di gobierno. Pa e motibo ey mes, mi ta kere cu comerciantenan ta optando pa e ruta pa haci nan mesun organisacion,” Lejuez a sigui bisa.

OBID NO A LOGRA META

Ora a puntra Lejuez, si e hecho cu comerciantenan mes kier lanta nan asociacion, ta nifica cu OBID no a logra su meta, Lejuez a bisa cu e ta kere cu e comerciantenan ta prefera pa controla nan mesun interesnan. “Mientras e intencion tras di un OBID tabata bon, e no a haya e acohida necesario,” Lejuez a conclui.

E CREACION DI OBID

Manera ta conoci, algun tempo atras, gobierno a anuncia e lantamento di OBID, cu mester a uni e comerciantenan den centro di ciudad, y unda cu a pone netamente un comerciante na cabez di esaki, esta conocido Stanley de Marchena. Pero ora cu recientemente e grupo di comerciante, cu a reuni cu minister, riba e tema di parkeermeter, a anuncia cu nan kier bin cu nan asociacion, a surgi e pregunta, pakico esaki ta necesario si ya caba tin e OBID. For di e tempo ey, por nota cu for di seno di gobierno, ta propaganda actividadnan rato rato, y ta manda relato pa prensa cu e anuncionan respectivo. Ta patrocina paginanan completo, pa propaganda actividadnan special durante temporada special. Tur pues, for di presupuesto di gobierno.

KEHO

Mientrastanto, for di mas comerciante, NoticiaCla.com a compronde cu nan ta preocupa cu caya grandi. Nan a prefera di keda anonimo, pa evita cualkier represaya. Pero nan ta mustra entre otro, cu e parkeermeter no necesariamente ta e causa principal. “Pero e tabata manera pone gasoline riba e candela.” E situacion di Venezuela tambe a afecta caya grandi, grandemente, segun e comerciantenan aki. “E la dal nos duro,” e comerciante ta bisa. “Economia di Aruba no ta bon. Hende ta preocupa di loke por bin.” Aki nan ta referi na e incertidumbre di p.e leynan pendiente cu tin cu bin ainda. Y sin cu comerciante no sa nan efecto, ni e fecha di ehecucion, nan no sa con elo afecta nan negoshi. Inversionistanan ta ‘on hold’, pendiente e leynan nobo aki, pa wak si cualkier inversion ta bale la pena, bou di e clima di inversion cu lo por wordo crea ora cu e leynan ‘nobo’ keda implementa. Tin mucho pregunta cu ta wordo haci, cu no tin contesta ariba. E tambe ta mustra cu un grupo grandi di comerciante, ora aña bolter, lo cuminsa e tramite pa un organisacion nobo di comerciante. “Aworaki nos no por pasobra no tin e tempo.”

MAS FRUSTRACION COMERCIAL

Recientemente un comerciante, cu no ta sconde su comentario, Stephen Daal, a splica NoticiaCla.com su frustracion cu e tin cu e.o. e proceso di douane. El a expresa su mes tambe, publicamente, riba su pagina di Facebook recientemente. Daal ta referi na e control di douane, cu a cuminsa luna pasa, pa evita traficacion ilegal di mercancia. “ Loke mas ta sorpresa mi ta cu e control ta asina severo, cu comercio ta sufriendo e efecto aki net den e temporada, cu mas nan por bende nan productonan,” Daal a declara. “ Maske mi mester ta pro controle y mester acepta un investigacion, mi ta keda di opinion cu mester tin maneranan mas manera pa haci e trabao aki”. Daal ta splica, cu den su caso como un broker te cu dia di awe ta 1 fout so nan a haña cerca dje, paso e no kier pasa pa "tira piedra sconde man". “ Dus mi ta kere cu nos tur cu ta hasi importacion ta haci fout. Pero no por ta asina, cu control ta andando y no tin niun sorto di evaluacion di un importado, si ta eherce su import na un manera eficaz, cu esaki mi kier sugeri Douane, pa evalua bon kico por wordo haci, pa suavisa e control pa esnan cu si ta cumpli pasobra awo ta " justo ta paga pa pecador". “Mi kier reitera, cu comercio ta e weso di lomba di economia di un pais y atrobe ta comercio ta wordo gestraf, como si fuera ta tur ta mucha malcria,” Daal a finalisa bisando.