A otorga e prome controle sticker pa vehiculo di motor 2016 na minister

ORANJESTAD – Departamento di Impuesto, a otorga e prome controle sticker pa vehiculo di motor 2016, na Minister di Finanzas, Angel Bermudez. Pa aña 2016, Departamento di Impuesto lo no otorga plachi di number nobo, na momento cu paga e impuesto pa vehiculo di motor, cu excepcion di e motociclistanan, cu si lo ricibi plachi nobo pa nan brommer.

MESUN PLACHI

E mesun plachinan di number di aña 2015 ta keda valido durante aña 2016. Como comprobante di pago di impuesto pa vehiculo di motor, nos clientenan lo ricibi un controle sticker. Ta importante pa menciona cu e control di comprobante di seguro ta keda valido, promer cu otorga un controle sticker. Clientenan di Departamento di Impuesto, por cuminsa paga impuesto pa vehiculo di motor 2016, entrante 16 di december 2015.

E COMPROBANTE DI SEGURO LO KEDA WORDO CONTROLA

Departamento ta keda controla e comprobante di seguro. Antes e control di seguro tabata tuma lugar despues di paga e impuesto pa vehiculo di motor. Awor e control ta tuma lugar prome cu haci e pago. Na e oficina principal na Camacuri esaki sosode na balie F1 te cu F4. Ora ta haci pago na un di e oficinanan di gobierno, e comprobante di seguro tambe wordo controla prome cu haci pago. E comprobante di seguro mester ta valido den 2016. E mester ta un polisa original of un copia cu stempel original di e compania di seguro.