Presidente di CFT Age Bakker: “Presupuesto di Corsow ta na ordo”

Willemstad – E presupuesto di 2016, manera esaki ta den proceso actualmente, lo haya un conseho positivo di CFT, en bista cu Gobierno a tene cuenta cu e recomendacionnan anterior di CFT,  consecuentemente e presupuesto ta na ordo. Asina leu cu e acuerdo di gobernacion nobo ta conduci na modificacion presupuestario den e presupuesto di 2016, CFT lo conseha mas aleu, si no elabora nan na un forma neutral den e presupuesto.Colegio di supervision financiero di Corsow y Sint Maarten (CFT) a haci un bishita na Corsow na cuminsamento di december. Ey Colegio a combersa cu Gobernador, Conseho di Minister y  Minister di Finansa. Tambe a informa Colegio mas detayadamente tocante e estado actual di e construccion di e hospital nobo.

PROGRAMA DI GOBERNACION

CFT a cera conoci cu e dos ministronan nobo, Señor Siegfried Victorina, como Ministro nobo di Salud Publico, Medio Ambiente y Naturalesa y  Señor Eugene Rhuggenaath, como Ministro di Asunto Economico. CFT a tuma nota di e programa di gobernacion y ta di acuerdo, cu e hecho cu ta continua cu e aspiracion na un maneho presupuestario sano, e empeño pa crea condicion pa fortalece e confiansa den economia y e atencion renoba pa ehecucion di proyecto di inversion. Fortalecemento di e capacidad di ehecucion, por conduci na ehecucion mas rapido di e inversionnan publico proyecta den e presupuesto di capital. Den caso cu e intensificacionnan incorpora den e programa di gobernacion, por ehempel pa extra dedicacion den enseñansa, tin consecuencia financiero, CFT ta desea di tende, si lo elabora esakinan den e presupuesto na un forma presupuestariamente neutral of no.

 EHECUSION DI 2016

CFT a evalua e reportahe di ehecucion, cu ta trata e prome nuebe lunanan di 2015. E imagen cu tin ta mustra positivo te ainda. Entretanto, a destina gran parti di e saldo positivo spera pa completa e fondo fluctuante, pa cubri e deficitnan continuo di e fondo di pensioen y pa absorba e deficitnan di explotacion di Sehos. A elabora esaki den e modificacion presupuestario, cu Parlamento a aproba dia 8 di december.

PRESUPUESTO DI 2016

Tratamento di e presupuesto di 2016, a tuma luga for di 9 di december te cu 15 di december. Na e momentonan aki, ainda tin algun punto di maneho di e programa di gobernacion nobo, insuficientemente elabora, pa por determina con leu esaki tin consecuencia, pa e presupuesto den un fase posterior. CFT ta spera, en todo caso, cu mas rapidamente posibel por clarifica ta cua efectonan presupuestario eventual tin y, si ta asina, con ta elabora esakinan den un modificacion presupuestario posterior. Aki ta bin acerca, cu lo mester implementa efectivamente na termino cortico, algun medida cu ya ta elabora den e presupuesto, manera revision di e areglo di pensioen pa empleado publico y reduccion di pensioen di persona no residente, pa preveni deficit nobo den e fondonan. Pa tal motibo CFT lo sigui monitorea e desaroyonan aki.

HNO

CFT a haya un presentacion tocante progreso di e construccion di e hospital nobo. Di esaki a sali na cla, cu por identifica algun riesgo relaciona cu e construccion di e hospital. CFT ta urgi gobierno pa cuantifica e riesgonan aki mas rapidamente posibel y, den consulta cu e contratista di e proyecto, yega na solucion, di moda cu marcha di e proyecto no confronta mas obstaculo. Un structura adecuado di tumamento di decision y di informacion entre gobierno como dunado di encargo y e organisacion di ehecucion como ehecutado di encargo, lo yuda pa haya un idea di e riesgonan cu anterioridad y pa tuma medida cu ta baha esakinan.