Reapertura refineria ta ‘reemplazo’ di ABB pa cubri presupuesto

ORANJESTAD – E posibel reapertura refineria ta e ‘reemplazo’ di ABB pa cubri presupuesto. Asina e mandatario di finanza, Angel Bermudez a bisa NoticiaCla.com diaranson mainta. Segun e mandatario, e situacion (entre gobierno di Aruba y College Aruba Financieel Toezicht) ta mas nuansa, cu e colegio a bisa e siman aki. Asina, Minister di Finanza, Angel Bermudez, a sigura NoticiaCla.com diaranson mainta. E ta referi na e hecho, cu gobierno lo tin te 31 di januari 2016, pa bin cu un forma pa genera 50 miyon extra, ya cu ABB (Algemene Bestemmings Belasting) no ta sigui mas (pa awor). Segun e mandatario, partidonan (gobierno y CAFT) a bay di acuerdo, pa den un caso extremo, warda te mei di 2016, pa wak con ta ‘cera e buraco’ financiero actual. Un di e posibilidadnan ta e reapertura di e refineria, segun e mandatario.

A CONTA CU ABB PA 2016

E mandatario a admiti na NoticiaCla.com, cu en berdad a entrega un presupuesto 2016, den cual a tene cuenta cu introduccion di un ABB, cu lo a crea un entrada, cu lo cubri gran parti di e presupuesto y logra cu e por yega na un deficit di 2.0 % di GDP, manera ley ta prescribi. Pero mirando cu a cancela ABB (por lo pronto), CAFT enberdad (segun Bermudez), a señala, cu lo tin un buraco di entre 45 pa 50 miyon den e presupuesto 2016.

TA SPERA RIBA REAPERTURA DI REFINERIA

Aki ta unda cu e mandatario a splica NoticiaCla.com, cu gobierno tin wowo riba e decision, cu tin cu cay na fin di december awor, riba e posibel reapertura di e refineria. Y cu si esey tuma lugar, e lo por genera e fondonan necesario, cu lo resolve e problemanan financiero di pais Aruba. “Nos a palabra cu e colegio, cu despues di e prome cuartal di 2016, nos lo sinta hunto y evalua na luna di mei.” Si tin indicacionnan fuerte, cu mester adapta e presupuesto, lo bin cu un Nota di Cambio, si esaki ta necesario, e mandatario a sigui splica.

GOBIERNO NO TIN BACK UP PLAN PA REFINERIA

Loke tambe Bermudez a admiti na NoticiaCla.com, ta cu gobierno no tin un ‘backup plan’, si e plan di refineria no duna su fruta. “Nos no a elabora riba e diferente aspectonan y e recomendacionnan, cu e colegio a duna ultimo dianan aki,” Bermudez a admiti. Motibo di esaki, segun e mandatario, ta cu tur nan atencion ta riba e presupuesto supletorio 2015. A bisa tambe, manera cu e presidente di CAFT a bisa, den curso di 2016, lo dicidi si sea ta check e aspecto di gasto of entrada, pa genera e fondonan necesario. Pero pa awor aki, gobierno no tin un 'backup plan', los di e reapertura di refineria.