Gremionan mes a acorda ley di VAS na 2012 den dialogo social

ORANJESTAD – E keho, di gremionan comercial riba e introduccion di e ley nobo di VAS, (pago di impuesto di ganashi) ta bin como sorpresa, pa e mandatario di finanza, Angel Bermudez. Sigur si, e gruponan aki, tabata parti di e decision na 2012, durante dialogo social y firma door di tur gremio den protocol. “Unico cos cu mi a haci, ta codific'e y haci'e ley despues di 3 aña,” Bermudez a sigura NoticiaCla.com. Pues e gremionan tabatin 3 aña, pa prepara nan mes pa e ley aki y cumpli cu e ley. Di otro banda, si den practica tin problema y cu e mandatario mester coopera (manera duna extension), e lo haci esey.

DISPUESTO PA AHUSTA

Segun Bermudez, gremionan cu tambe a firma y bay di acuerdo, por a prepara nan clientenan pa bay cu e ley. Pa aworaki, belastingdienst ta esun encarga cu ehecucion di e ley aki. “Belastingdienst, como esun cu ta ehecuta e ley, lo sa di bin cu e flexibilidad necesario,” Bermudez a bisa. E mandatario ta referi tambe, muy en particular, cu esnan cu ta ‘in good standing', cu nan lo haya en todo caso, e comprension y flexibilidad di belastingdienst.

BELASTINGDIENST TIN CU PIDI MINISTER

Ademas e mandatario ta corda, cu tin un sistema di uitstel aden caba, cu bo por haci voorlopige aangifte. “E ora bo ta haya automaticamente uitstel.” Belastingdienst pa ley tin cu ehecuta. Y e mandatario a bisa, cu e ‘no ta bay mete la pata den nan autoridad’. Esey riba e hecho, cu e gremionan a manda e cartanan, tur dirigi na su nomber, pues pa nan, e ta esun cu ta tuma e accion. “Naturalmente si nan weita cu den praktijk, nan mira cu tin cierto problema, cu mester un solucion caminda mi mester copera, sigur mi lo duna e cooperacion ey. “Pero a base di nan peticion y evaluacion,” e mandatario a sigui bisa.

KEHO DI AVVB

E Asociacion di Asesornan Fiscal na Aruba, AVvB, tabata e prome cu a pidi gobierno, pa extende e 'deadline' pa entrega, di e declaracion di impuesto pa 2014. Segun un carta, fecha 11 di december 2015 - cu NoticiaCla.com a pone man ariba - , e asociacion ta bisa gobierno, cu nan no por cumpli cu e fecha di 30 di december 2015, manera e ley nobo a stipula, y a pidi pa extende esaki te februari di 2016. “Riba e fecha aki, tur declaracion di impuesto riba ganashi di 2014 factualmente, mester ta entrega, y tur e pago di e ganashi mester tuma lugar.”

MOTIBO PA EXTENSION

E asociacion ta referi, den nan carta na e ley, cu recientemente, a keda aproba, den parlamento, cu ta pone cu tur comerciante, mester cumpli cu e ley, pa dia 30 di december 2015. “Esaki ta nifica, cu tur contribuyente di impuesto di ganashi, tin 15 dia di trabou (di cual 3 a vence caba), pa entrega e declaracion di impuesto (di ganashi)." Algo cu segun e asociacion, ta imposibel pa e oficina di conseheronan di impuesto, pa cumpli cu ne. Y nan a duna, por lo menos 5 motibo, pa cual esaki ta un problema. Culpando e ‘termino cortico’, ‘apenas a ricibi declaracionnan di e impuesto rekeri’, ‘no ta cla cu e documentonan’, ‘vacacion di e comerciantenan den e tempo aki’ y ‘problema cu cash flow pa algun comerciante’ (lesa e condicionnan den e carta aki).

EXTENSION

Como tal, a pidi e mandatario, pa un extension pa e declaracion ‘temporal’, te cu dia 29 di februari 2016. Banda di esaki, ta pidi pa un areglo di pago, pa pago di impuesto di ganashi 2014. Ademas, nan ta dispuesto, pa discuti nan preocupacion y e solucion mas a fondo, cu e mandatario.  

CAMBIO DI LEY

Manera ta conoci, 18 di november ultimo, Parlamento a aproba e ley, Landsverordening Vastlegging Begunstigend Beleid: Invordering Voldoening op Aangifte Winstbelasting. Riba 8 di december ultimo, e ley a keda publica, cu ta nifica cu pa 9 di december ultimo, e ley a drenta na vigor oficialmente. Esey ta stipula, cu e 'deadline' di entrega, di e declaracion di impuesto di ganashi pa 2014, mester ta entrega mas tarda dia 30 di december 2015, y mester paga esaki tambe mesora. Despues di AVvB, tanto KvK, como ATIA a reacciona tambe den mesun tono, indicando, cu nan no ta di acuerdo cu e ley su ultimatum, y a avisa e mandatario di esaki, pa medio di relatonan den prensa.  Scucha entrevista cu minister Bermudez riba e tema di VAS aki