Aruba Airlines a inaugura buelo comercial pa Corsou y Sto Domingo

ORANJESTAD –Aruba Airlines, a inaugura su prome buelo comercial pa Corsou y Santo Domingo awe mainta, cu nan Airbus A-320. CEO di e compania, sr. Onno de Swart, a considera e dia aki como uno special. Y mientras cu berdad cada bez, segun de Swart, nan ta yega otro ‘milestone’, esaki ta uno special. “E ta un buelo den Reino mes, parti Hulandes, den Caribe, hermana isla Corsou,” e hefe hoben a bisa. “Cu orguyo, mi tin cu bisa cu e buelo ta sali completamente yen pa Corsou (150 pasahero),” de Swart a bisa cu un sonrisa riba su cara.

CREA HUB PROME

A admiti, cu a dura hopi prome cu por a haci e buelo aki, no obstante tur peticion cu tabatin. “A dicidi cu ta bula e buelo, despues cu nos crea e 'hub'. Nos tin un 'hub in place awor',” de Swart a bisa, refiriendo na e coneccion, cu pasaheronan por haci di Corsou, pa mas destinacion. A haci mencion cu e buelo aki, pa haci'e mas rendable, cu e tipo di avion, cu ta bula e ruta, ta sigui pa Santo Domingo. “Con cu bay bin, e pueblo Dominicano tambe por disfruta di e buelo aki,” de Swart a bisa.

TARIFA MAS BARATA

Na NoticiaCla.com, de Swart, a haci mencion di e tarifa mas economico, cu e aerolinea ta cobra, compara cu su competencia. “E gastonan a subi tanto na Aruba, como Corsow. E gastonan operacion ta basta halto,” de Swart a admiti. A referi na e tempo di antes, cu ta cumpra un pasashi di 100 florin, pa bula pa Corsow. “E tempo ey a pasa,” de Swart a sigui bisa. Nan a haci nan esfuerso, pa toch bin cu un tarifa, cu a cay na agrado di un y tur. “Ta p'esey mi ta kere cu e prome buelo ta yen aki caba.” NOTA: fotonan di Corsou, ta cortesia di Ingmar Kock.