Polis a frustra entrada masal di ilegalnan Venezolano na Aruba

ORANJESTAD - Polis a frustra entrada masal di ilegal na Sero Colorado. Tabata diamars anochi alrededor di 11:30am, cu a drenta yamada di bisiñanan di Sero Colorado, cu ta informa di movecionnan straño den e bario. Polis a mobilisa mesora pa e sitio y na altura di JADS y e Kapel di Colony, a topa cu un cantidad di hende muha ainda, cu a declara cu nan a yega cu boto y a landa bin tera. Den e proceso, a para un auto den cual a haya 3 local sospechoso, cu tabata yudando e grupo aki. Den e auto a haya un arma di candela tambe.

SOSPECHOSONAN

E sospechosonan deteni ta: J. Barrios-Villero, naci na Punto Fiho, Venezuela, dia 29 di juni 1971,  J. G. Chirinos-Valles, naci na Coro, Venezuela, dia 4 di april 1988,  F.L. Sece-Millan, naci na Piedra Plata, Venezuela, dia 9 di september 1982,  A.E. Rodriguez naci na Coro, Venezuela, dia 17 di april 1985 y tambe su ruman  E.J. Rodriguez naci na Coro, Venezuela, dia 7 di juli 1982.

DETENCION DI LOCALNAN

Separa di esunnan indocumenta, tambe Polisnan na e sitio, a logra detene e localnan envolvi den promove traficacion di hende. Nan ta:  E.O. Gomez, naci na Republica Dominicana, pero cu nacionalidad Hulandes, di 33 aña di edad. A detene riba sospecha, di ta anda den "mensenhandel" y "vuurwapenverordening". Tambe a detene  R.E. Velasquez, naci na Republica Dominicana, pero cu nacionalidad Hulandes, di 28 aña di edad. Ta sospech'e di e delito "mensenhandel" y di a faya na nos "vuurwapenverordering". E di tres y ultimo local deteni ta,  R. del C. Luque, di nacionalidad Hulandes, pero naci na Venezuela, di 48 aña di edad. Ta sospech'e di "mensenhandel".

BUSKEDA

E buskeda den e area aki a sigui, cu consecuencia cu alrededor di 3:00 am, a detene un otro grupo na altura di e gate 2 di entrada di refineria. Ey a gara:  A.A. Montiel-Causil, naci na Pinto Salina, Venezuela, dia 14 di december 1981 y  E.F. Esteba-Gomez, naci na Venezuela, dia 18 di october 1988.

OTRONAN SI A LOGRA DRENTA

Ta importante pa señala, cu no por descarta, cu e grupo aki tabata mas grandi y cu otronan a logra sconde of haya cooperacion di localnan, pa drenta nos isla. Ta adverti tur hende, cu e delito di traficacion di hende, ta un delito castigabel pa ley! Sinembargo, e cooperacion y sosten di comunidad, dor di bisiña nan atento, ta duna un man pa Polisnan por haci nan trabou den forma mas eficiente.