Refineria y finanzas publico entre temanan pa vigila na 2016

ORANJESTAD – Camara di Comercio, ta mira reapertura di refineria, cu e por tin un efecto positivo pa nos economia. Pero mester tin cautela. Esaki debi cu tin informacion, cu tin investigacion contra PDVSA na Merca, cu por tin impacto riba e operacion di CITGO. Tambe e opinion di CAFT, por tin efecto riba kico ta pasa cu gobierno na 2016. Asina Presidente di KvK, Daphne Lejuez, a duna e impresion con KvK ta mira e proximo aña su retonan y trabounan cu tin nos dilanti.

REAPERTURA REFINERIA

Mientras tin e posibilidad, di reapertura di refineria cu un efecto positivo pa nos economia, toch mester anda cu cautela, segun Lejuez. E ta referi aki, na e raportahe den Wall Street Journal recientemente (Oct 2015), unda cu Merca, a cuminsa cu un investigacion contra PDVSA y ta pone e operacion di CITGO den cuestion.

CAFT

E colegio di supervision financiero di Aruba (CAFT), tambe tin atencion di KvK pa 2016. “CAFT ta keda indica, cu begroting 2016 no ta realistico, y falta di introduccion ABB, lo crea un buraco adicional di 50 miyon, pa por alcansa e meerjaren raming,” Lejuez a bisa. CAFT ta boga pa gobierno coregi e falta aki, door di reduci su gastonan, adicional na e reduccionnan palabra di 90 miyon, di cual apenas 6 miyon a keda realisa na 2015, treciendo esaki, na mas di 130 miyon, cu gobierno lo mester ‘scapa’ di su banda.

INVERSION LIMITA

Loke ta precupa KvK segun Lejuez, ta cu e probabilidad ta grandi, cu comercio ta bai keda cauteloso den su inversion, ya cu ta premira cu lo mester introduci medida, pa por alcansa e palabracionnan cu gobierno a haci, pa yega na balanced budget akkoord. Akinan KvK ta spera, cu gobierno ta auto-critico y cuminsa corta su propio gastonan y proyectonan no-urgente, prome cu acudi na comercio of comunidad.

AUTOCRITICO Y TRANSPARENTE

KvK ta spera cu den 2016, gobierno ta mas transparente y auto critico y tambe inclui stakeholders, pa asina por brainstorm tocante e diferente retonan nos dilanti, pa asina realmente por brinda un clima economico mas balansa.

DIALOGO SOCIAL

Segun Lejuez, dialogo social, riba su mes ta un bon idea, pero no a dunele e contenido necesario, door di no cumpli cu tur e acuerdonan firma, y solamente cumpli cu e partinan, cu ta beneficioso pa gobierno. “Mester tin e boluntad y corahe politico, pa tuma e decisionnan necesario pa bienestar di nos economia y nos pais.”

ESTRICTO CU FINANZAS

Y por ultimo KvK ta spera cu Parlamento, al igual cu ta pasa ley pa cobra VAS a corto plaso, ta mesun estricto cu gobierno pa cu su finanzas y ta cuminsa eherce e control necesario y na tempo y no ta pasa ley sin cu tin draagvlak di comunidad. “KvK, manera a keda presenta den su publicacion, ta keda boga pa mehora "doing business" na Aruba, pa asina por crea otro tipo di inversion, pa asina purba diversifica y crea otro tipo di pilarnan economico,” Lejuez a finalisa bisando.